ஓடும் பேருந்தில் முதியவர் உயிரிழந்த சம்பவம் சோகத்தை ஏற்படுத்தியுள்ளது.
புதுக்கோட்டை மாவட்டத்திலுள்ள கே.புதுப்பட்டி கிராமத்திற்கு அரசு டவுன் பேருந்து சென்றுள்ளது. இந்த பேருந்தில் ஏறிய 70 வயது மதிக்கத்தக்க முதியவர் ஒருவர் கே. புதுப்பட்டி செல்ல வேண்டும் என கூறி பயணச்சீட்டு வாங்கியுள்ளார். இந்நிலையில் பேருந்து கே.புதுப்பட்டி வந்த பிறகும் இருக்கையில் அமர்ந்து இருந்ததால் முதியவரிடம் இறங்குமாறு நடத்துனர் கூறியுள்ளார். ஆனால் அந்த முதியவர் எந்த அசைவும் இன்றி இருந்ததால் உடனடியாக இதுகுறித்து நடத்துனர் காவல்துறையினருக்கு தகவல் தெரிவித்துள்ளார்.
அந்த தகவலின் படி சம்பவ இடத்திற்கு விரைந்து சென்ற காவல்துறையினர் திடீரென இறந்த முதியவரின் கையில் வைத்திருந்த பையை சோதனை செய்துள்ளனர். இதனையடுத்து அந்த முதியவர் கோயம்புத்தூர் மாவட்டத்தைச் சேர்ந்த மலைராஜ் என்பது தெரியவந்துள்ளது. அதன் பின் முதியவரின் சடலத்தை கைப்பற்றிய காவல்துறையினர் அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். மேலும் இதுகுறித்து வழக்குப்பதிவு செய்த காவல்துறையினர் தீவிர விசாரணை மேற்கொண்டு வருகின்றனர்.