பிரபல நடிகர் தீப் சித்து ( வயது 37 ) சாலை விபத்தில் உயிரிழந்துள்ளார். ஹரியானா மாநிலம் சோனிபட் அருகே இந்த விபத்து நடைபெற்றுள்ளது. குண்ட்லி-மனேசர்-பல்வால் (கேஎம்பி) விரைவுச்சாலையில் பிப்லி சுங்கச்சாவடி அருகே நின்று கொண்டிருந்த டிரக் மீது தனது காரை தீப் சித்து மோதியதால் அவர் விபத்தில் உயிரிழந்ததாக ஹரியானா காவல்துறை தெரிவித்துள்ளது.
கடந்த 2021-ல் குடியரசு தினத்தன்று செங்கோட்டை வன்முறை வழக்கில் நடிகர் தீப் சித்து மீது குற்றம் சுமத்தப்பட்டிருந்தது. இவர் கடந்த 2015-ஆம் ஆண்டு முதல் திரைப்படங்களில் நடித்து வருகிறார். மொத்தம் 6 படங்களில் அவர் நடித்துள்ளார். அவர் சமூக ஆர்வலராகவும் செயல்பட்டு வந்தார். அவரது திடீர் மரணம் அனைவரையும் அதிர்ச்சியில் ஆழ்த்தியுள்ளது. அவரது இறப்பிற்கு பலரும் இரங்கல் தெரிவித்து வருகின்றனர்.