நெல்லையில் கொள்ளையர்களை துணிச்சலாக விரட்டியடித்த தம்பதியினருக்கு அதீத துணிவுக்கான விருதை வழங்க உள்ளதாக தமிழக அரசு அறிவித்துள்ளது.
நெல்லை மாவட்டம் கடையம் அருகே உள்ள கல்யாணிபுரத்தில் சண்முகவேல் மற்றும் செந்தாமரை ஆகிய வயதான தம்பதியினர் வசித்து வருகின்றனர். இவர்களது மகன்கள் வெளியூரில் வசித்து வருவதால் இந்த தம்பதியினர் தனியாக வசித்து வருகின்றனர். இந்த நிலையில் நேற்று முன்தினம் இரவு வீட்டின் வெளியே சண்முகவேல் நாற்காலியில் அமர்ந்திருந்தார். அப்போது அவரது பின்புறமாக வந்த கொள்ளையர்கள் அவரின் கழுத்தை துண்டை போட்டு நெரித்துள்ளனர்.
இதையடுத்து அவரது அலறல் சத்தம் கேட்டு வீட்டில் இருந்த செந்தாமரை வெளியில் வந்து சற்றும் பயப்படாமல் துணிந்து கையில் கிடைத்த செருப்பு, நாற்காலி உள்ளிட்டவற்றை கொண்டு கொள்ளையர்கள் இருவரையும் தாக்கினார். அவருடன் சேர்ந்து சண்முகவேலும் நாற்காலியை கொண்டு தாக்கினார். கொள்ளையர்கள் இருவரும் கையில் அரிவாள் வைத்திருந்தும் பயப்படாமல் தைரியமாக எதிர்த்து விரட்டினர்.இதில் செந்தாமரைக்கு மட்டும் கையில் சிறிது அரிவாள் வெட்டு காயம் ஏற்பட்டது. இருந்தும் கூட போராட்டத்தை அவர் விடவில்லை. இந்த காட்சிகள் அங்கிருந்த சிசிடிவியில் பதிவாகியுள்ளது. இந்த வீடியோ சமூக வலைத்தளங்களால் வைரலாகி பரவி வந்த நிலையில்,
துணிச்சலாக போராடிய வயதான தம்பதியினரை நெல்லை மாவட்ட எஸ்பி நேரில் சென்றும் பிரபல கிரிக்கெட் வீரர் ஹர்பஜன் சிங் பாலிவுட் நடிகர் அமிதாப் பச்சன் உள்ளிட்டோர் ட்விட்டர் பாராட்டி வந்தனர். இந்நிலையில் நெல்லை மாவட்ட ஆட்சியர் தம்பதியினருக்கு வீர தீர செயலுக்கான விருதை வழங்க வேண்டும் என தமிழக முதல்வரிடம் பரிந்துரை செய்துள்ளார். இந்நிலையில் நாளை நடைபெற சென்னையில் நடைபெற உள்ள சுதந்திர தின விழாவில் தம்பதியினருக்கு அதீத துணிவுக்கான விருது வழங்கப்பட உள்ளதாக தமிழக அரசு சார்பில் தெரிவிக்கப்பட்டுள்ளது.