பெயிண்டர் அடித்துக் கொலை செய்யப்பட்ட சம்பவம் பரபரப்பை ஏற்படுத்தியுள்ளது.
கோயம்புத்தூர் மாவட்டத்திலுள்ள வீரகேரளம் பகுதியில் தர்மலிங்கம் என்ற பெயிண்டர் வசித்து வந்துள்ளார். இந்நிலையில் தர்மலிங்கம் வீட்டில் இருந்த போது கடந்த 23ஆம் தேதி காரில் வந்த மர்ம நபர்கள் அவரிடம் தனியாக பேசவேண்டும் என்று கூறி அழைத்துச் சென்றுள்ளனர். அப்போது தர்மலிங்கத்தின் தாயாரான லட்சுமி தனது மகனை எங்கு அழைத்துச் செல்கிறீர்கள் என அந்த மர்ம அவர்களிடம் கேட்டுள்ளார். அதற்கு அவர்கள் சிறிது நேரம் பேசிவிட்டு தர்ம லிங்கத்தை அனுப்பி விடுவதாக தெரிவித்துள்ளனர். இந்நிலையில் காரில் அவர்களுடன் புறப்பட்டு சென்று தர்மலிங்கம் நீண்ட நேரமாகியும் வீடு திரும்பவில்லை.
இதனையடுத்து வீரகேரளம் டாஸ்மாக் மதுக்கடைக்கு பின்புறம் உள்ள மயானத்தில் தர்மலிங்கம் இறந்து கிடப்பதாக அவரது தாய் லட்சுமிக்கு தகவல் கிடைத்துள்ளது. மேலும் அவரது உடலில் பல இடங்களில் காயங்கள் இருந்ததால் தனது மகனின் சாவில் மர்மம் இருப்பதாக வடவள்ளி காவல் நிலையத்தில் லட்சுமி புகார் அளித்துள்ளார். அந்த புகாரின் பேரில் வழக்குப்பதிவு செய்த காவல்துறையினர் காரில் அழைத்து சென்ற 5 நபர்களில் 2 பேரை பிடித்து விசாரித்துள்ளனர். அந்த விசாரணையில் அவர்கள் செட்டிபாளையம் பகுதியில் வசிக்கும் முத்துக்குமார் மற்றும் பிரபு என்பது தெரியவந்துள்ளது. அதன் பின் தர்மலிங்கத்துடன் அந்த 5 பேரும் மது குடிப்பதை வழக்கமாக வைத்துள்ளனர்.
இதனையடுத்து அவர்கள் வைத்திருந்த 3 கிராம் நகை மற்றும் ரொக்கப்பணம் காணாமல் போனதால் அதனை தர்மலிங்கம் தான் எடுத்திருக்க வேண்டும் என்ற சந்தேகத்தில் அவரை கடத்தி சென்றதாக தெரிவித்துள்ளனர். அதன் பின் அவரிடம் நகை, பணம் திருடு போனது குறித்து விசாரித்த போது அவர்களுக்கிடையே தகராறு ஏற்பட்டுள்ளது. அப்போது கோபமடைந்த 5 பேரும் இணைந்து தர்மலிங்கத்தை தாக்கியதில் அவர் உயிரிழந்து விட்டதாக அவர்கள் தெரிவித்துள்ளனர். மேலும் இதுகுறித்து காவல்துறையினர் தொடர்ந்து விசாரணை நடத்தி தலைமறைவான 3 பேரை வலைவீசி தேடி வருகின்றனர்.