நியூசிலாந்து அணி அடுத்த ஆண்டில் 2 முறை பாகிஸ்தானில் சுற்றுப்பயணம் மேற்கொள்ள உள்ளதாக பாகிஸ்தான் கிரிக்கெட் போர்டு தெரிவித்துள்ளது.
நியூசிலாந்து அணி கடந்த செப்டம்பரில் பாகிஸ்தானில் சுற்றுப்பயணம் மேற்கொண்டு டி20 மற்றும் ஒருநாள் போட்டியில் விளையாட இருந்தது. ஆனால் பாதுகாப்பு அச்சுறுத்தல் காரணமாக ஒருநாள் போட்டி தொடங்குவதற்கு முன்பாகவே நியூசிலாந்து அணி சுற்றுப்பயணத்தை ரத்து செய்து நாடு திரும்பியது. இந்த நிலையில் நியூசிலாந்து அணி ரத்து செய்த போட்டியையும் சேர்த்து அடுத்த ஆண்டு டிசம்பர் மாதம் மற்றும் 2023-ஆம் ஆண்டு ஏப்ரல் மாதம் என 2 முறை பாகிஸ்தானில் சுற்றுப்பயணம் மேற்கொள்ள உள்ளது. இதுகுறித்து அந்நாட்டு கிரிக்கெட் வாரிய தலைவர் ரமீஸ் ராஜா கூறும்போது,” நியூசிலாந்து கிரிக்கெட் வாரியத்துடன் கலந்தாலோசித்து இந்த முடிவு எடுக்கப்பட்டுள்ளது.
ஐசிசி உலக டெஸ்ட் சாம்பியன்ஷிப் போட்டி சார்பாக 2 டெஸ்ட் போட்டியும், ஐசிசி ஆடவர் உலககோப்பை சூப்பர் லீக் தொடருக்காக 3 ஒருநாள் போட்டியிலும் நியூசிலாந்து அணிக்கு எதிராக அடுத்த ஆண்டு டிசம்பர் மாதம் பாகிஸ்தான் அணியுடன் மோத உள்ளது. அதேபோல் இந்த ஆண்டு ரத்து செய்யப்பட்ட போட்டிகளுக்கு பதிலாக 2023-ஆம் ஆண்டு ஏப்ரல் மாதத்தில் 5 ஒருநாள் மற்றும் 5 டி20போட்டிகளில் பாகிஸ்தான் அணியுடன் மோத உள்ளது. மேலும் இந்த இரு சுற்றுப்பயணங்களும் நியூசிலாந்து- பாகிஸ்தான் நாடுகளுக்கிடையே புரிதலையும், நட்பையும் அதிகரிக்கும் ” இவ்வாறு அவர் கூறியுள்ளார் . இதன் மூலம் 2022-ஆம் ஆண்டு மார்ச் மாதம் முதல் 2023-ம் ஆண்டு ஏப்ரல் மாதம் வரை பாகிஸ்தான் கிரிக்கெட் அணி நியூசிலாந்து, இங்கிலாந்து மற்றும் ஆஸ்திரேலியா ஆகிய அணிகளுடன் மொத்தம் 8 டெஸ்ட் , 11 ஒருநாள் மற்றும் 13 டி20 போட்டிகளில் விளையாட உள்ளது .