பாகிஸ்தானில் கடந்த 24 மணி நேரத்தில் மட்டும் 6,397 பேர் தொற்றினால் பாதிக்கப்பட்டிருப்பதாக அந்நாட்டு அரசு தெரிவித்துள்ளது
உலக நாடுகளிடையே பரவி ஏராளமான உயிர் பலியை எடுத்துவரும் கொரோனா தொற்று பாகிஸ்தானில் தற்போது அதிவேகமாக பரவி வருகின்றது. தொற்று பரவுவதை தடுக்க பாகிஸ்தான் அரசு பல நடவடிக்கைகளை தீவிரமாக எடுத்து வரும் நிலையில் மக்கள் பொது இடங்களில் கூட தடை விதித்து சமூக இடைவெளியை கடைப்பிடிக்க வலியுறுத்தப்பட்டுள்ளது. இந்நிலையில் கடந்த 24 மணி நேரத்தில் மட்டும் பாகிஸ்தானில் 6,397 பேருக்கு கொரோனா தொற்று உறுதிப்படுத்தப்பட்டுள்ளது.
இதனால் நாடு முழுவதும் தொற்றினால் பாதிக்கப்பட்டவர்களின் எண்ணிக்கை 1,25,933 ஆக உயர்ந்துள்ளது. அதோடு ஒரேநாளில் பாகிஸ்தானில் உயிரிழந்தவர்களின் எண்ணிக்கை 107 அதிகரித்துள்ளது. இதனால் அங்கு மொத்தம் 2,463 பேர் தொற்றுக்கு பலியாகியுள்ளனர். பாதிக்கப்பட்டவர்களில் 40,247 பேர் குணமடைந்து வீடு திரும்பியுள்ளனர். இதனை அடுத்து பாகிஸ்தான் உலக அளவில் கொரோனா தொற்றினால் பாதிக்கப்பட்டோர் எண்ணிக்கையின் அடிப்படையில் 15 ஆவது இடத்தில் உள்ளது.
