தேனி மாவட்டத்தில் பிளாஸ்டிக் முட்டை விற்கப்படுவதாக சமூக வலைத்தளங்களில் ஒருவர் பதிவிட்ட வீடியோ காட்சிகள் தற்போது வைரலாகி வருகின்றது.
தேனி மாவட்டம் வருசநாட்டில் வசித்து வருபவர் செல்வம். இவர் நேற்று முன்தினம் அப்பகுதியில் உள்ள ஒரு கடையில் இருந்து முட்டைகளை வாங்கியுள்ளார். இதனையடுத்து வாங்கிய முட்டைகளை குடும்பத்தினர் சமைத்து சாப்பிட்டுள்ளனர். இந்நிலையில் அவர்கள் சாப்பிட்டது போக மீதம் 2 வேகவைத்த முட்டைகள் இருந்துள்ளது. அந்த முட்டைகளை வழக்கமாக இருக்கும் முட்டைகளை விட சற்று கடினமாகவும், பிளாஸ்டிக் முட்டை போல் இருந்துள்ளது. இதனை பார்த்து சந்தேகமடைந்த செல்வம் செல்போனில் வீடியோ பதிவு செய்த படி அந்த முட்டையை உடைத்துள்ளார்.
இதனைத்தொடர்ந்து முட்டையில் எவ்வித வாசனையும் வராததால் செல்வம் அந்த வீடியோவை சமூக வலைத்தளங்களில் பதிவிட்டுள்ளார். இதனை பார்த்த பலரும் அதனை பகிந்துள்ள நிலையில் தற்போது அந்த வீடியோ வைரலாகி வருகின்றது. இதனையடுத்து பிளாஸ்டிக் அரிசி போல பிளாஸ்டிக் முட்டையும் விற்கப்படுகிறதா என மக்களிடையே பெரும் அச்சத்தை ஏற்படுத்தியுள்ளது. மேலும் இந்த விவகாரத்தில் சம்மந்தப்பட்ட துறை அதிகாரிகள் உரிய நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனர்.