ராமர் கோவில் கட்டுமான பணிகள் தொடங்கி முடித்தபின் எவ்வாறு அந்த ஆலயம் இருக்கும் என்பதை சுட்டிக்காட்டும் வகையில் தற்போது புகைப்படங்கள் வைரலாகி வருகின்றன.
ராமபிரான் பிறந்த இடமான உத்தரபிரதேச மாநிலத்தில் அமைந்துள்ள அயோத்தியில் பிரமாண்டமான முறையில் கோவில் கட்டுவதற்கான பூமி பூஜை மற்றும் அடிக்கல் நாட்டு விழா நாளை நடக்க இருக்கிறது. இதில் பிரதமர் மோடி கலந்து கொண்டு பகல் 12.15 மணியளவில் ராமர் கோவிலுக்கான அடிக்கல்லை நாட்டுகிறார்.
மேலும் இந்த விழாவில் பல முக்கிய தலைவர்களான ஆர்.எஸ்.எஸ். தலைவர் மோகன் பகவத், மாநில முதல்- மந்திரி யோகி ஆதித்யநாத் மற்றும் விஸ்வ இந்து பரிஷத் தலைவர்கள், கோவிலின் கட்டுமான பணிகளை மேற்கொள்ளும் ராமஜென்மபூமி தீர்த்த ஷேத்ரா அறக்கட்டளை நிர்வாகிகள் என பலர் பங்கேற்க உள்ளனர்.
கொரோனா மற்றும் பயங்கரவாத அச்சுறுத்தலை தவிர்க்க அயோத்தி முழுவதும் பலத்த பாதுகாப்பு வளையத்துக்குள் கொண்டு வரப்பட்டு வரலாறு காணாத கண்காணிப்பு மற்றும் சோதனை நடவடிக்கைகள் மேற்கொள்ளப்பட்டு வருகின்றன. இந்த விழாவில் பிரதமர் உள்ளிட்ட மிக மிக முக்கிய பிரமுகர்கள் பங்கேற்க இருப்பதால் பாதுகாப்பு ஏற்பாடுகள் மிகவும் தீவிரப்படுத்தப்பட்டுள்ளது.
இந்நிலையில் ராமர் கோயில் கட்டி முடித்த பின்னர் எப்படியிருக்கும் என்ற கண்ணோட்டத்தில் மாதிரி புகைப்படங்கள் வெளியிடப்பட்டுள்ளது. அந்த மாதிரி புகைப்படத்தில், கோவிலின் உச்சியில் காவிக்கொடி பறக்க, அழகான கட்டமைப்புகளுடன் ராமர் கோயில் காட்சிப்படுத்தப்பட்டுள்ளது.
