தகராறில் ஈடுபட்டவர்களை விலக்கி வைத்த போலீசாரை தாக்கிய குற்றத்திற்காக 4 பேரை போலீசார் கைது செய்து விசாரித்து வருகின்றனர்.
திண்டுக்கல் மாவட்டத்திலுள்ள வேடசந்தூரில் ஒரு டாஸ்மாக் கடை இயங்கி வருகிறது. இந்த டாஸ்மாக் கடையில் மகாமுனி என்பவர் மேற்பார்வையாளராக பணியாற்றி வருகிறார். அங்கு அப்பகுதியில் வசித்து வரும் தாமரைக்கனி, அருண், நாட்ராயன் மற்றும் கார்த்தி ஆகிய நான்கு பேர் சில்லரை பிரச்சனை காரணமாக அவரிடம் வாக்குவாதத்தில் ஈடுபட்டனர். அப்போது மதுவிலக்கு பிரிவு போலீஸ் ஏட்டு மாரிமுத்து என்பவர் சாதாரண உடையில் வந்து ரோந்து பணியில் ஈடுபட்டிருந்தார்.
அங்கு வந்த மாரிமுத்து தகராறில் ஈடுபட்ட அந்த நால்வரையும் விலக்கிவிட்டார். இதனால் கோபமடைந்த அந்த நான்கு பேரும் ஏட்டு மாரிமுத்துவை கீழே தள்ளிவிட்டு தாக்கியது மட்டுமல்லாமல், மகாமுனியிடம் கத்தியை காட்டி கொலை மிரட்டல் விடுத்து அங்கிருந்து தப்பித்து ஓடிவிட்டனர். இந்நிலையில் திண்டுக்கல் அரசு மருத்துவமனையில் சிகிச்சை பெற்று வரும் மாரிமுத்து அளித்த புகாரின் பேரில், வேடசந்தூர் போலீஸ் இன்ஸ்பெக்டர் கவிதா வழக்கு பதிந்து நாட்ராயன், தாமரைக்கண்ணி உள்ளிட்ட 4 பேரை கைது செய்து தீவிர விசாரணை மேற்கொண்டு வருகின்றனர்.