காவல்துறை அதிகாரி வீட்டில் பணம் மற்றும் நகையை மர்ம நபர்கள் திருடிச் சென்ற சம்பவம் பரபரப்பை ஏற்படுத்தியுள்ளது.
கள்ளக்குறிச்சி மாவட்டத்தில் உள்ள பாரதி நகர் பகுதியில் சதீஷ் என்பவர் வசித்து வருகிறார். இவர் காவல்துறை அதிகாரியாக வேலை பார்த்து வருகிறார். இவருக்கு திருமணமாகி ராஜபிரியா என்ற மனைவி உள்ளார். இந்நிலையில் ராஜபிரியா தனது வீட்டை பூட்டி விட்டு குழந்தைகளுடன் அதே பகுதியில் இருக்கும் தாய் வீட்டிற்கு சென்று தங்கியுள்ளார். அதன்பின் திரும்பி வீட்டிற்கு வந்து பார்த்த போது முன்பக்க கதவின் பூட்டு உடைக்கப்பட்டு இருந்ததை கண்டு அதிர்ச்சி அடைந்துள்ளார்.
பின்னர் உள்ளே சென்று பார்த்ததில் பீரோவில் இருந்த 3 3/4 பவுன் தங்க நகைகள், 10,000 ரூபாய் ரொக்கப் பணம் காணாமல் போனது தெரியவந்துள்ளது. இது குறித்து ராஜபிரியா காவல்நிலையத்தில் புகார் கொடுத்துள்ளார். மேலும் இச்சம்பவம் குறித்து வழக்குப்பதிவு செய்த காவல்துறையினர் பணம் மற்றும் நகையை கொள்ளையடித்து சென்ற மர்ம நபர்களை வலைவீசி தேடி வருகின்றனர்.