விழுப்புரம் அருகே பொது இடங்களில் மது அருந்தும் இளைஞர்களுக்கு நூதன தண்டனை வழங்கிய காவல் உதவி ஆய்வாளர்க்கு மக்கள் பாராட்டு தெரிவித்தனர்.
விழுப்புரம் அடுத்த எருமனத்தாங்கல் கிராமத்தில் கால்நடை மருத்துவமனை இயங்கி வருகிறது. இந்த மருத்துவமனை வளாகத்தை போதை ஆசாமிகள் ஆக்கிரமித்துள்ளனர். அவர்கள் மதுபாட்டில்களை உடைத்து அப்பகுதியை அசிங்கப்படுத்திவிட்டும் செல்கின்றனர். இதனால் பெரிதும் பாதிப்படைந்த அப்பகுதி மக்கள் காவல்துறையினருக்கு தகவல் அளித்தனர். இதனையடுத்து விழுப்புரம் தாலுகா காவல் நிலைய உதவி ஆய்வாளர் பிரகாஷ் இச்சம்பவம் தொடர்பாக சில இளைஞர்களை கைது செய்தார்.
அவர்களுக்கு மதுவினால் ஏற்படும் தீமை குறித்து எடுத்துரைத்த அவர் இனிமேல் மதுகுடிக்க மாட்டோம் என போதை இளைஞர்களை உறுதிமொழி எடுக்க செய்தார். இதனைத்தொடர்ந்து மருத்துவமனை வளாகத்தை சுற்றியுள்ள மது பாட்டில்களையும், குப்பைகளையும் அகற்ற செய்தார். அதன்பின் அந்த இளைஞர்களுக்கு எச்சரிக்கை விடுத்து அனுப்பினார். உதவி ஆய்வாளர் பிரகாஷ் இந்த நூதன தண்டனையை பொது மக்களிடையே பெரும் வரவேற்பை பெற்றுள்ளது.