பீஸ்ட் திரைப்படத்திற்கான பட்ஜெட் அதிகரித்திருப்பதால் இயக்குனர் நெல்சன் மீது தயாரிப்பு நிறுவனம் அதிருப்தியில் இருப்பதாக தகவல் வெளியாகியுள்ளது.
பிரபல தொலைக்காட்சியில் உதவி இயக்குனராக இருந்த இயக்குனர் நெல்சன் தற்போது நடிகர் தளபதியின் பீஸ்ட் திரைப்படத்தை இயக்கும் அளவிற்கு வளர்ந்திருக்கிறார். இயக்குனர் நெல்சன், கடந்த 2018 ஆம் வருடத்தில் வெளியான கோலமாவு கோகிலா திரைப்படத்தின் மூலமாக தமிழ் திரையுலகில் இயக்குனராக களமிறங்கினார்.
அதனைத்தொடர்ந்து கடந்த வருடம் நடிகர் சிவகார்த்திகேயனை வைத்து டாக்டர் திரைப்படத்தை இயக்கியிருந்தார். இவ்விரு திரைப்படங்களும் ரசிகர்களிடம் அதிக வரவேற்பை பெற்றது. டாக்டர் திரைப்படம் வெளிவருவதற்கு முன்பாகவே இயக்குனர் நெல்சன், தளபதி விஜய்யை வைத்து பீஸ்ட் திரைப்படத்தை இயக்கி கொண்டிருப்பதாக அறிவித்திருந்தார்.
இத்திரைப்படத்தை சன் நிறுவனம் தயாரிக்கிறது. தற்போது இத்திரைப்படத்திற்கான படப்பிடிப்புகள் முடிவடைந்தது. வெளியிடுவதற்கான இறுதிகட்ட பணிகள் நடந்து கொண்டிருக்கிறது. இத்திரைப்படம் வரும் ஏப்ரல் மாதத்தில் வெளியாகும் என்று அதிகாரப்பூர்வமாக அறிவிக்கப்பட்டது.
இந்நிலையில், பீஸ்ட் திரைப்படத்திற்காக நெல்சன் குறிப்பிட்ட பட்ஜெட்டை விட தற்போது அதிகமாகியிருப்பதாக கூறப்படுகிறது. அதாவது, இத்திரைப்படம் 80% நிறைவடைவதற்கு முன்பாகவே குறிப்பிட்ட பட்ஜெட்டை தாண்டியதாக கூறப்படுகிறது. இதனால் இயக்குனர் நெல்சன் மீது தயாரிப்பு நிறுவனம் அதிருப்தியில் இருப்பதாக கூறப்படுகிறது.