ஏர் கலப்பையுடன் சாலையில் அமர்ந்து விவசாயிகள் போராட்டத்தில் ஈடுபட்டதால் போக்குவரத்து கடுமையாக பாதிக்கப்பட்டுள்ளது.
டெல்லியில் விவசாயிகள் புதிய வேளாண் சட்டங்களை திரும்பப் பெற வலியுறுத்தி போராட்டம் நடத்திவருகின்றனர். இந்நிலையில் நாடு முழுவதும் விவசாயிகள் சாலை மறியலில் ஈடுபட்டுள்ளனர். அதன்படி தேசிய தென்னிந்திய நதிகள் இணைப்பு விவசாயிகள் சங்க தலைவர் அய்யாக்கண்ணு தலைமையில் திருச்சியில் சாலைமறியல் போராட்டம் நடைபெற்றுள்ளது. இந்நிலையில் திருச்சியில் உள்ள அய்யாக்கண்ணு வீட்டில் இருந்து ஏர் கலப்பையுடன் விவசாயிகள் கரூர் தேசிய நெடுஞ்சாலைக்கு வந்துள்ளனர்.
அந்த சமயம் அப்பகுதியில் பாதுகாப்பு பணியில் ஈடுபட்டிருந்த போலீசார் போராட்டத்தில் ஈடுபட்டவர்களை தடுத்து நிறுத்தியுள்ளனர். அப்போது விவசாயிகளுக்கும், போலீசாருக்கும் இடையே தள்ளுமுள்ளு ஏற்பட்டுள்ளது. ஆனாலும் அனைத்து தடைகளையும் மீறி அரை நிர்வாண கோலத்தில் விவசாயிகள் சாலையில் அமர்ந்து போராட்டத்தில் ஈடுபட்டுள்ளனர். இதனால் அப்பகுதியில் கடுமையான போக்குவரத்து நெரிசல் ஏற்பட்டது.