லாரி மீது கார் மோதிய விபத்தில் புதுமாப்பிள்ளை பலியான நிலையில், 3 பேர் மருத்துவமனையில் அனுமதிக்கப்பட்டுள்ள சம்பவம் பரபரப்பை ஏற்படுத்தியுள்ளது.
கர்நாடக மாநிலத்திலுள்ள பெங்களூரில் சாப்ட்வேர் என்ஜினீயரான சீனிவாசலு என்பவர் வசித்து வந்துள்ளார். இவருக்கு கடந்த 22-ஆம் தேதி சென்னையில் வசிக்கும் கனிமொழி என்ற பெண்ணுடன் திருமணம் நடைபெற்றுள்ளது. இந்நிலையில் சீனிவாசலு தனது மனைவி கனிமொழி மற்றும் உறவினர்களுடன் பெங்களூரில் இருந்து சென்னைக்கு காரில் புறப்பட்டுள்ளார். இந்த காரை சீனிவாசலு ஓட்டி சென்றுள்ளார். இவர்கள் கிருஷ்ணகிரி மாவட்டத்தில் உள்ள கண்டம்பட்டி பேருந்து நிறுத்தம் அருகில் சென்று கொண்டிருந்த போது சாலையோரம் நின்று கொண்டிருந்த லாரி மீது கார் மோதி விட்டது. இந்த விபத்தில் படுகாயமடைந்த சீனிவாசலு சம்பவ இடத்திலேயே பரிதாபமாக இறந்துவிட்டார்.
மேலும் கனிமொழி மற்றும் உறவினர்களான சுமலதா, ரிஷிகா ஆகியோருக்கு படுகாயம் ஏற்பட்டுள்ளது. இது குறித்து தகவல் அறிந்த காவல்துறையினர் சம்பவ இடத்திற்கு விரைந்து சென்ற இடிபாடுகளில் சிக்கி படுகாயமடைந்தவர்களை மீட்டு அரசு மருத்துவமனையில் சிகிச்சைக்காக அனுமதித்துள்ளனர். அதன்பின் சீனிவாசலுவின் சடலத்தை கைப்பற்றி அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். இதுகுறித்து வழக்குப்பதிவு செய்த காவல்துறையினர் லாரி ஓட்டுநரான அருணாச்சலம் என்பவரிடம் விசாரணை மேற்கொண்டு வருகின்றனர்.