இடி மின்னலுடன் அரை மணி நேரம் பெய்த மழையால் அலங்காநல்லூரில் குளிர்ச்சி நிலவுகிறது.
தமிழகம் முழுவதும் வெயில் சுட்டெரித்து வாட்டுகின்றது. இந்த வெயிலால் மக்கள் வெளியில் செல்ல முடியாமல் தவித்து வருகின்றனர். இந்நிலையில் மதுரை மாவட்டத்தில் அலங்காநல்லூரில் நேற்று மாலை திடீரென இடி மின்னலுடன் கூடிய கனமழை பெய்துள்ளது. சுமார் அரை மணி நேரத்திற்கும் மேலாக பெய்த இந்த மழையால் பழைய காவல் நிலையம், பஸ் நிலையம் உள்ளிட்ட பல பகுதிகளில் மழை நீர் சூழ்ந்துள்ளது.
மேலும் கேட்டுக்கடை பகுதிகளில் சாக்கடை நீர் வெளியேற முடியாமல் தேங்கியதால் வாகனங்கள் செல்வதற்கு சிரமமாக இருந்தது. இந்த சித்திரை கோடை மழை பெய்துள்ளதால் தோட்ட பயிர்கள் செழிப்பாக உள்ளதாக விவசாயிகள் மகிழ்ச்சியில் உள்ளனர்.