நடிகர் ரஜினி கட்சி தொடங்கவில்லை என்று அறிவித்ததை கடுமையாக விமர்சித்து நடிகை கஸ்தூரி கிண்டலடித்து பதிவிட்டுள்ளார்.
தமிழகத்தில் கடந்த 20 ஆண்டுகளுக்கு மேலாக இதோ வருகிறேன், இதோ வருகிறேன் என்று பூச்சாண்டி காட்டிய ரஜினி, தனது அரசியல் பிரவேசம் குறித்து கடந்த டிசம்பர் 3 ஆம் தேதி அதிகாரப்பூர்வமாக அறிவித்தார். தமிழகத்தின் தலையெழுத்தை மாற்ற இதோ எனது தலைவன் வந்துவிட்டான் என்று ரசிகர்கள் ஆரவாரம் செய்ய தமிழக அரசியல்வாதிகள் கொஞ்சம் பீதியடைந்தனர். இந்நிலையில் கட்சி தொடங்கிய அரசியலுக்கு வர முடியவில்லை என்பதை மிகுந்த வருத்தத்துடன் தெரிவித்துக் கொள்கிறேன் என்று நடிகர் ரஜினி பரபரப்பு அறிவிப்பை வெளியிட்டுள்ளார்.
என்னை நம்பி என்னுடன் வருபவர்களை நான் பலிகடா ஆக்க விரும்பவில்லை. முடிவு பற்றி அறிவிக்கும் போது எனக்கு ஏற்பட்ட வலி எனக்கு மட்டுமே தெரியும். தேர்தல் அரசியலுக்கு வராமல் மக்களுக்கு என்னால் என்ன செய்ய முடியுமோ அதை நான் செய்வேன் என்று அவர் தெரிவித்துள்ளார். இந்த அறிவிப்பு அவரின் ரசிகர்களிடையே ஏமாற்றத்தை ஏற்படுத்தியுள்ளது.
இந்நிலையில் ரஜினியை விமர்சித்த நடிகை கஸ்தூரி வெளியிட்டுள்ள பதிவில், “கோடி பண நஷ்டத்தை விட கோடி மனக்கஷ்டம் பெரிது. உயிருக்கும் தோல்விக்கும் பயந்தவர்கள் போருக்கு வரக் கூடாது. இது எதிர்பார்ப்புதான். எத்தனையோ முறை நான் உட்பட பலரும் சொன்னதுதான். எப்பவும் சொல்லியிருந்தால் ஏராளமானவர்களுக்கு ஏற்பட்டிருக்கும் வலியை தவிர்த்திருக்கலாம். வருடங்களை மிச்சப்படுத்தி இருக்கலாம். இப்பவாச்சும் சொன்னாரே. இப்ப இல்ல, எப்பவுமே இல்லை” என்று ரஜினியை கடுமையாக விமர்சித்து கஸ்தூரி கிண்டலடித்துள்ளார்.