கோவையிலிருந்து கேரளாவிற்கு காய்கறி லாரியில் மறைத்து ரூ.1¼ கோடி ஹவாலா பணத்தை கொண்டு வந்த இருவரை கைது செய்த போலீசார், அதனை பறிமுதல் செய்தனர்.
கேரளாவுக்கு தேவையான பெரும்பாலான அத்தியாவசிய பொருட்களான காய்கறிகள் மற்றும் மளிகை பொருட்கள் ஆகியவை தமிழகத்திலிருந்து தான் கொண்டு செல்லப்படுகிறது. அதன்படி கோவையிலிருந்து கொண்டு செல்லப்படும் பொருட்கள் அனைத்துமே வாளையாறு சோதனைச் சாவடி வழியாக தான் கேரளாவிற்கு செல்கின்றன. தற்போது கொரோனா தொற்று பாதிப்பின் காரணமாக சோதனைச்சாவடியில் வழக்கத்தைவிட காவல்துறையினர் தீவிர கண்காணிப்பு பணியில் ஈடுபட்டு வருகின்றனர்.
இந்நிலையில் தமிழகத்திலிருந்து கேரளாவுக்கு போதை பொருட்கள் மற்றும் உரிய ஆவணங்கள் இல்லாமல் கட்டுக்கட்டாக பணம் கடத்தி கொண்டு செல்லப்படுவதாக பாலக்காடு மாவட்ட காவல் கண்காணிப்பாளர் சிவவிக்ரமத்திற்கு ரகசிய தகவல் கிடைத்தது.
இந்த தகவலையடுத்து காவல் ஆய்வாளர் லிபி, போதை தடுப்பு பிரிவு காவல்துறையினர் ஜெயக்குமார், சுனில்குமார் மற்றும் விஜயநாத் ஆகியோர் வாகன சோதனையில் ஈடுபட்டனர். அப்போது கோவையிலிருந்து வாளையாறு வழியாக பாலக்காட்டுக்கு காய்கறி லோடு ஏற்றிக் கொண்டு லாரி ஒன்று வேகமாக வந்து கொண்டிருந்தது.
சந்தேகத்தின்பேரில் லாரியை நிறுத்தி அதிலிருந்த 2 பேரிடம் காவல்துறையினர் விசாரணை மேற்கொண்டனர். இதில் அவர்கள் பதட்டத்துடன் முன்னுக்குப்பின் முரணான பதில் கூறினர். இதையடுத்து லாரியில் காவல்துறையினர் சோதனை மேற்கொண்டனர். இதில் காய்கறி மூட்டைக்கு கீழே அடியில் மறைத்து வைத்து முறையான ஆவணங்கள் ஏதும் இல்லாமல் ரூ.1 ¼ கோடி ஹவாலா பணம் இருந்தது கண்டுபிடிக்கப்பட்டது.
இதையடுத்து காவல்துறையினர் லாரியில் இருந்தவர்களிடம் கிடுக்கிப்பிடி விசாரணை நடத்தியதில், அவர்கள் கேரள மாநிலம் ஆலுவாயை சேர்ந்த சலாம் (40) மற்றும் அவரது அண்ணன் மிதயன் குஞ்சு என்பதும், கோவையிலிருந்து பணத்தை கடத்தி வந்ததும் தெரியவந்தது. இதைத் தொடர்ந்து பணத்தை பறிமுதல் செய்த போலீசார் அண்ணன்-தம்பி இருவரையும் கைது செய்தனர். மேலும் லாரியையும் கைப்பற்றினர். பின்னர் 2 பேரையும் பாலக்காடு நீதிமன்றத்தில் ஆஜர்படுத்தி ஜெயிலில் அடைத்தனர்.
