இயக்குனர் சுகுமார் இயக்கத்தில் அல்லு அர்ஜுன் நடிப்பில் கடந்த ஆண்டு வெளியாகி மிகப்பெரிய வெற்றியை பெற்ற திரைப்படம் புஷ்பா. இப்படத்தின் கதாநாயகியாக ராஷ்மிகா மந்தனா நடித்திருந்தார். செம்மரக்கட்டை கடத்தலை மையமாகக் கொண்டு எடுக்கப்பட்ட இந்த திரைப்படம் தெலுங்கு மொழியில் உருவாக்கப்பட்டு தமிழ், இந்தி, மலையாளம், கன்னடம் உள்ளிட்ட இந்திய மொழிகளில் வெளியாகி ரூ.350 கோடி வசூலை ஈட்டியது. இப்படத்தில் இடம்பெற்ற ஊ சொல்றியா மாமா.. என்ற பாடலுக்கு சமந்தா கவர்ச்சி நடனம் ஆடி இருந்தார்.
இந்த பாடல் தற்போது வரை ரசிகர்கள் பலரின் முணுமுணுப்பாக இருந்து வருகிறது. அதனை தொடர்ந்து ‘புஷ்பா தி ரூல்’ படத்தின் படப்பிடிப்பு ஆகஸ்ட் மாதம் தொடங்கியது. இதிலும் முதல் பாகத்தில் இருந்தது போல் சமந்தாவின் பாடல் காட்சி ஒன்று இருக்கும் என்று கூறப்பட்டது. இந்நிலையில் புஷ்பா இரண்டாம் பாகத்தில் சமந்தா இடம் பெறவில்லை என்ற தகவல் வெளியாகியுள்ளது. சமந்தாவிற்கு பதிலாக தமன்னாவிடம் பல குழுவினர் பேச்சுவார்த்தை நடத்தி வருவதாக சினிமா வட்டாரங்கள் தெரிவிக்கின்றனர். ஆனால் இதை படக்குழு உறுதிப்படுத்தவில்லை.