கல்குவாரியில் வேலை செய்து கொண்டிருந்த மூதாட்டி அரவை இயந்திரத்தில் சிக்கி உயிரிழந்த சம்பவம் அப்பகுதியில் பரபரப்பை ஏற்படுத்தியுள்ளது.
தேனி மாவட்டம் ஆண்டிபட்டி அருகே உள்ள பிராதுகாரன்பட்டி கிராமத்தில் வசித்து வரும் போஸ் என்பவருக்கு பிச்சையம்மாள் என்ற மனைவி உள்ளார். இவர் கடந்த 6 ஆண்டுகளாக கருப்பத்தேவன்பட்டியில் உள்ள தனியார் கல்குவாரியில் வேலை பார்த்து வருகின்றார். இந்நிலையில் சம்பவத்தன்று வழக்கம்போல வேலைக்கு பிச்சையம்மாள் சென்றுள்ளார். இதனையடுத்து அவர் வேலை செய்து கொண்டிருக்கும்போது அங்கிருந்த கன்வேயர்பெல்ட்டில் பிச்சையம்மாளின் சேலை சிக்கி எதிர்பாராத விதமாக அரவை இயந்திரத்தில் தவறி விழுந்துள்ளார்.
இதில் பிச்சையம்மாள் சம்பவ இடத்திலேயே பரிதாபமாக துடிதுடித்து உயிரிழந்துள்ளார். இதனை பார்த்த அங்கிருந்தவர்கள் உடனடியாக க.விலக்கு காவல்நிலையத்திற்கு தகவல் அளித்துள்ளனர். தகவலறிந்து சென்ற காவல்துறையினர் பிச்சையம்மாளின் உடலை மீட்டு உடற்கூராவிர்க்காக தேனி அரசு மருத்துவமனைக்கு அனுப்பி வைத்துள்ளனர். மேலும் இதுகுறித்து வழக்குபதிவு செய்து விசாரணை மேற்கொண்டு வருகின்றனர்.