சசிகலாவை விடுதலை செய்ய கூடாது என முதல்வர் எடியூரப்பாவுக்கு காங்கிரஸ் பிரிவு செயலாளர் கடிதம் எழுதியுள்ளார்.
சொத்துகுவிப்பு வழக்கு தொடர்பாக சசிகலா, சுதாகரன், இளவரசி ஆகிய மூவரும் பெங்களூரு பரப்பனஅக்ரஹாரா சிறையில் அடைக்கப்பட்டு இருக்கின்றனர். இந்த நிலையில், சிறைவாசம் அனுபவித்து வரும் சசிகலா நன்னடத்தையின் அடிப்படையில் முன்னதாகவே வெளிவர இருப்பதாக தகவல் வெளியாகி இருக்கிறது. ஆனால் அவரை முன்கூட்டியே விடுவிக்க கூடாது என்று வலியுறுத்தி முதல்வர் எடியூரப்பாவுக்கு, காங்கிரஸ் தொழிலாளர் பிரிவு செயலாளர் முத்து மாணிக்கம் கடிதம் எழுதி இருக்கிறார்.
அந்தக் கடிதத்தில்,” சொத்துகுவிப்பு வழக்கில் பரப்பனஅக்ரஹாரா சிறையில் அடைக்கப்பட்டுள்ள சசிகலா விதிமுறைகளை மீறி சிறப்பு சலுகைகளை அனுபவித்ததாக சிறைத்துறை முள்னாள் டி.ஐ.ஜி. ரூபா குற்றம் சாட்டி இருக்கிறார். இந்த சிறப்பு சலுகைகளை பெற, பணம் கைமாறியதாக குறித்து அரசின் உத்தரவின் பேரில் சிறப்பு விசாரணை குழு விசாரித்தது. அந்த குழு இன்னும் விசாரணை அறிக்கையை வழங்காத நிலையில் நன்னடத்தை அடிப்படையில் சசிகலாவை முன்கூட்டியே விடுதலை செய்ய கூடாது” இவ்வாறு அந்த கடிதத்தில் குறிப்பிடப்பட்டிருந்தது.