ஆற்றில் மூழ்கி பன்னிரண்டாம் வகுப்பு படிக்கும் மாணவன் உயிரிழந்த சம்பவம் சோகத்தை ஏற்படுத்தியுள்ளது.
கடலூர் மாவட்டத்திலுள்ள திருச்சோபுரம் கிராமத்தில் மணிவண்ணன் என்பவர் வசித்து வருகிறார். இவருக்கு 12ஆம் வகுப்பு படிக்கும் மதன் என்ற மகன் இருந்துள்ளார். இந்நிலையில் அதே பகுதியில் இருக்கும் உப்பனாறு பாலம் அருகே மதன் தனது நண்பர்களுடன் ஆற்றில் குளித்துக் கொண்டிருக்கும் போது ஆழமான பகுதிக்கு சென்றுள்ளார். இதனால் எதிர்பாராத விதமாக மதன் தண்ணீரில் மூழ்கி விட்டார். இதனையடுத்து மதனின் நண்பர்களும் அருகிலிருந்தவர்களும் அவரை தீவிரமாக தேடி பார்த்துள்ளனர்.
இது குறித்து தகவலறிந்த புதுச்சத்திரம் காவல்துறையினரும், தீயணைப்பு வீரர்களும் சம்பவ இடத்திற்கு விரைந்து சென்று மதனை தேடும் பணியில் தீவிரமாக ஈடுபட்டுள்ளனர். இதனையடுத்து சுமார் பல மணி நேர போராட்டத்திற்கு பிறகு மதனின் சடலத்தை தீயணைப்பு வீரர்கள் மீட்டனர். அதன்பின் காவல்துறையினர் அவரது உடலை கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்துள்ளனர். மேலும் இதுகுறித்து வழக்குப்பதிவு செய்த காவல்துறையினர் தீவிர விசாரணை மேற்கொண்டு வருகின்றனர்.