மின்சாரவாரிய அலுவலர்களுக்கான மாவட்ட அளவிலான விளையாட்டு போட்டிகள் நடத்தப்பட்டது.
தமிழ்நாடு மின்சார வாரியம் சார்பில் மின்வாரிய அலுவலர்கள், பணியாளர்களுக்கான மாநில அளவிலான ஆண்கள் விளையாட்டு போட்டிகள் ஆண்டுதோறும் நடத்தப்பட்டு வருகிறது. இதனை முன்னிட்டு மாவட்ட அளவிலான விளையாட்டு போட்டிகள் நடத்தப்பட்டு வருகிறது. அதன்படி நேற்று தூத்துக்குடி மாவட்ட விளையாட்டு அரங்கில் தூத்துக்குடி மாவட்ட அளவிலான மின்சார வாரிய அலுவலர்களுக்கான விளையாட்டு போட்டி நடைபெற்றது. இந்த போட்டிகள் தூத்துக்குடி மின்பகிர்மான வட்ட மேற்பார்வை பொறியாளர் குருவம்மாள் தலைமையில் நடைபெற்றது. மேலும் இந்த போட்டியில் செயற்பொறியாளர் ரெமோனா முன்னிலை வகித்தார்.
இதனையடுத்து இந்த போட்டியில் மாவட்ட விளையாட்டு அலுவலர் ஜெயரத்தினராஜன் கலந்து கொண்டு பேசினார். இந்நிலையில் கேரம், சதுரங்க போட்டிகள், தடகள போட்டிகள் ஆகியவை நடத்தப்பட்டன. இதில் திரளான மின்சார வாரிய ஊழியர்கள், அலுவலர்கள் கலந்து கொண்டு விளையாடினர். இந்த போட்டிகளை கணேசன், நோபுள் ஸ்டேன்லி, கலைக்கண்ணன், தமிழரசன், பொன்மணி ஆகியோர் நடத்தினர். இந்த போட்டிகளில் வெற்றி பெறும் விளையாட்டு வீரர்கள் மண்டல அளவிலான போட்டிகளிலும், மண்டல அளவிலான போட்டிகளில் வெற்றி பெறுபவர்கள் மாநில அளவிலான விளையாட்டு போட்டிகளிலும் கலந்து கொண்டு விளையாடவுள்ளனர்.