இலங்கையில் புதிய பிரதமராகப் பதவியேற்றிருக்கும் ரணில் விக்ரமசிங்கே, நாடு நிதி நெருக்கடியில் சிக்கியபோது உதவிய பிரதமர் நரேந்திர மோடிக்கு நன்றி கூறியிருக்கிறார்.
இலங்கை, இதற்கு முன் எப்போதும் இல்லாத அளவிற்கு கடும் நிதி நெருக்கடியில் சிக்கியது. மேலும், அரசியல் குழப்பங்களும் போராட்டங்களும் நிலையை மேலும் மோசமடைய செய்தது. எனவே, பிரதமர் மஹிந்த ராஜபக்ஷ பதவி விலகினார். இதனைத்தொடர்ந்து ஐக்கிய தேசியக் கட்சியின் தலைவர் மற்றும் முன்னாள் பிரதமரான ரணில் விக்கிரமசிங்கேவுடன் கடந்த புதன்கிழமை அன்று பேசிய அதிபர் கோட்டபாய ராஜபக்ச நாட்டின் பிரதமர் பதவியை ஏற்குமாறு அவரிடம் கேட்டிருக்கிறார்.
அதனைத் தொடர்ந்து, நேற்று மாலையில் புதிய பிரதமராக ரணில் விக்ரமசிங்கே பொறுப்பேற்றார். இந்நிலையில் கடும் பொருளாதார நெருக்கடியில் சிக்கித் தவித்த இலங்கைக்கு உதவி புரிந்த இந்தியா மற்றும் பிரதமர் நரேந்திர மோடிக்கு நன்றி கூறினார். தன் ஆட்சிக்காலத்தில் இந்திய நாட்டுடன் நெருங்கிய நட்புறவை ஏற்படுத்துவேன் என்றும் கூறியிருக்கிறார்.