காவல் நிலையம் முன்பு நிறுத்தி வைத்திருந்த சப்-இன்ஸ்பெக்டரின் மோட்டார் சைக்கிளை மர்ம நபர் திருடிச் சென்ற சம்பவம் அதிர்ச்சியை ஏற்படுத்தியுள்ளது.
திருச்சி மாவட்டத்திலுள்ள எடமலைப்பட்டிபுதூர் காவல் நிலையத்தில் செல்வகுமார் என்பவர் சிறப்பு சப்-இன்ஸ்பெக்டராக வேலை பார்த்து வருகின்றார். இந்நிலையில் செல்வகுமார் இரவுநேர பணியின்போது காவல் நிலையம் முன்பு இருக்கும் பாலத்திற்கு கீழ் தனது மோட்டார் சைக்கிளை நிறுத்தி விட்டு சென்றுள்ளார். இதனையடுத்து வேலை முடிந்து திரும்பி வந்து பார்த்தபோது காவல் நிலையம் முன்பு நிறுத்தி வைக்கப்பட்டிருந்த தனது மோட்டார் சைக்கிள் காணாமல் போனதை கண்டு செல்வகுமார் அதிர்ச்சி அடைந்தார்.
இதுகுறித்து தான் வேலை பார்க்கும் காவல் நிலையத்திலேயே செல்வகுமார் புகார் அளித்துள்ளார். அதன்பிறகு காவல்துறையினர் அப்பகுதியில் பொருத்தப்பட்டுள்ள சிசிடிவி கேமராவில் பதிவான காட்சிகளை ஆய்வு செய்த போது மர்ம நபர் ஒருவர் மோட்டார் சைக்கிளை திருடி சென்றது தெரியவந்துள்ளது. இதுகுறித்து வழக்குப்பதிவு செய்த காவல்துறையினர் மோட்டார் சைக்கிளை திருடி சென்ற மர்ம நபரை வலை வீசி தேடி வருகின்றனர்.