நெதர்லாந்துக்கு எதிரான போட்டியில் 20 ஓவர் முடிவில் இந்திய அணி 2 விக்கெட் இழப்பிற்கு 179 ரன்கள் குவித்தது.
8ஆவது டி20 உலகக் கோப்பை கிரிக்கெட் தொடர் ஆஸ்திரேலியாவில் 8 நகரங்களில் தற்போது விறுவிறுப்புக்கும் பரபரப்புக்கும் பஞ்சம் இல்லாமல் நடைபெற்று வருகிறது. முதல் கட்டமாக தகுதி சுற்று போட்டிகள் முடிவடைந்த நிலையில், அதிலிருந்து 4 அணிகள் சூப்பர் 12 சுற்றுக்கு தேர்வு செய்யப்பட்டு, தற்போது குரூப் 1 இல் 6 அணிகள் குரூப் 2ல் 6 அணிகள் என மொத்தம் 12 அணிகள் சூப்பர் 12 சுற்றில் விளையாடி வருகின்றன.
இந்நிலையில் குரூப் 2 பிரிவில் உள்ள இந்தியா மற்றும் நெதர்லாந்து அணிகள் சிட்னி கிரிக்கெட் மைதானத்தில் மோதியது. இந்திய நேரப்படி இன்று மதியம் 12: 30 மணிக்கு மேல் இப்போட்டி தொடங்கியது. இதில் டாஸ் வென்ற இந்திய அணி பேட்டிங்கை தேர்வு செய்தது. அதன்படி இந்திய அணியின் தொடக்க வீரர்களாக கேஎல் ராகுல் மற்றும் ரோஹித் சர்மா இருவரும் களமிறங்கி ஆட்டத்தை தொடங்கினார்.
இதில் மீகெரென் வீசிய 3ஆவது ஓவரில் கே எல் ராகுல் 9 ரன்னில் அவுட் ஆகி மீண்டும் ஏமாற்றமளித்தார். இதையடுத்து கோலியுடன் ரோகித் சர்மா கை கோர்த்தார். இருவரும் பொறுமையாக தொடங்கிய நிலையில் ரோகித் சர்மா அதிரடியாக விளையாடி அரை சதம் அடித்தார்.அதன்பின் ரோஹித் சர்மா 39 பந்துகளில் 4 பவுண்டரி, 3 சிக்சர் உட்பட 53 ரன்கள் எடுத்த நிலையில் அவுட் ஆனார். அப்போது இந்திய அணியின் ஸ்கோர் 12 ஓவரில் 84/2 என இருந்தது. இதையடுத்து சூரியகுமார் யாதவும், விராட் கோலியும் ஜோடி சேர்ந்து அதிரடி காட்டினார். விராட் கோலி சிறப்பாக விளையாடி அரை சதம் கடந்தார்.
தொடர்ந்து கடைசி ஓவரில் இந்திய அணி 17 ரன்கள் எடுத்தது. அதில் கடைசி பந்தை சூர்யகுமார் சிக்ஸர் அடித்து தனது அரைசதத்தை பதிவு செய்தார். இறுதியில் 20 ஓவர் முடிவில் இந்திய அணி 2 விக்கெட் இழப்பிற்கு 179 ரன்கள் குவித்தது. விராட் கோலி 44 பந்துகளில் 3 பவுண்டரி 2 சிக்ஸர் உட்பட 62 ரன்களுடனும், சூர்யகுமார் யாதவ் 25 பந்துகளில் 7 பவுண்டரி ஒரு சிக்ஸர் உட்பட 51 ரன்களுடன் அவுட் ஆகாமல் களத்தில் இருந்தனர்..
