கடலூரில் கடைகளுக்கான வாடகையை பலமடங்கு ஏற்றியதை கண்டித்து வியாபாரிகள் நகராட்சியை முற்றுகையிட்டு போராட்டம் நடத்தினர்.
கடலூர் நகராட்சிக்கு சொந்தமாக மஞ்சக்குப்பம், முதுகூர், பான்பரி உள்ளிட்ட மார்க்கெட் பகுதிகளில் சுமார் 650 கடைகள் உள்ளன. இந்த கடைகளுக்கு நியாயமான முறையில் மாதம்தோறும் வாடகை நகராட்சி சார்பில் வசூலிக்கப்பட்டுள்ளது.
இந்நிலையில் திடீரென வியாபாரிகளுக்கு சுமையை ஏற்படுத்தும் விதமாக பல மடங்கு வரியை உயர்த்தி நகராட்சி அறிவித்தது. அந்த வரியை செலுத்தாதவர்களின் கடைகளை பூட்டி சீல் வைத்தது. அதிகப்படியான வாடகையால் நொந்த வியாபாரிகள் தங்களால் இதனை சமாளிக்க முடியவில்லை என்று நீதிமன்றத்தில் வழக்கு தொடர்ந்தனர். இருப்பினும் வாடகை வசூலிப்பதில் நகராட்சி கரடுமுரடாக நடந்துகொண்டது.
இதையடுத்து ஞாயமான வாடகை வசூலிக்க நகராட்சியை வலியுறுத்துமாறு வியாபாரிகள் சார்பில் கூட்டமைப்பு சங்கம் ஒன்று புதிதாக உருவாக்கப்பட்டது. அதில் நடந்த கூட்டத்தில் முழு கடையடைப்பு நடத்தி நகராட்சியை முற்றுகையிட்டு வாடகை குறைக்குமாறு போராட்டம் நடத்த வேண்டும் என்று முடிவு செய்யப்பட்டது. அதன்படி நேற்று காலை கடலூர் நகராட்சியை வியாபாரிகள் முற்றுகையிட்டு அநியாய விலை ஏற்றத்தை கண்டித்து போராட்டம் நடத்தினர். இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.