கொரோனா வைரஸ் தாக்கத்தால் கடந்த 24 மணி நேரத்தில் 3ஆயிரத்துக்கும் அதிகமானோர் உயிரிழந்துள்ளது உலக நாடுகளை வேதனையடைய வைத்துள்ளது.
கடந்த டிசம்பர் மாதம் சீனாவின் ஹூபேய் மாகாணத்தின் வுகான் நகரில் கண்டுபிடிக்கப்பட்ட கொரோனா வைரஸ் தற்போது உலகின் 198 நாடுகளில் பரவி கதிகலங்க வைத்துள்ளது. இந்த வைரஸ் கொடூர தாக்குதலின் வீரியம் நாளுக்கு நாள் அதிகரித்துக்கொண்டே செல்வதாலும், இதற்கு மருந்து கண்டுபிடிக்க முடியாமல் இருப்பதாலும் உலக நாடுகள் இதனை கட்டுப்படுத்த முடியாமல் திணறி வருகின்றனர்.
நாளுக்கு நாள் பலி எண்ணிக்கையும் , பாதிக்கப்பட்டோரின் எண்ணிக்கையும் அதிகரித்துக் கொண்டே செல்கின்றது. உலகளவில் கொரோனா வைரஸ் தாக்கத்தால் 657,434 பேர் பாதித்துள்ளனர். 141,419 பேர் குணமடைந்த நிலையில் 30,420 பேர் உயிரிழந்துள்ளனர். 485,595 பேர் சிகிச்சை பெற்று வரும் நிலையில் 25,248 பேர் இக்கட்டான நிலையில் இருந்து வருகின்றனர்.
கொரோனா வைரசால் அதிக உயிரிழப்பாக இத்தாலியில் 10,023 பேரும், ஸ்பெயினில் 5,812 பேரும் உயிரிழந்துள்ளனர். கடந்த 24 மணி நேரத்தில் கொரோனவால் பாதிக்கப்பட்டவர்களின் எண்ணிக்கையும் மக்களை குலைநடுங்க செய்கிறது. புதிதாக 61,122 பேருக்கு கொரோனா தொற்று உறுதி செய்யப்பட்ட நிலையில் 3,078 பேர் உயிரிழந்துள்ளனர்.