தமிழகத்தில் தொடர்ந்து நான்காவது நாளாக கொரோனா தொற்று 4 ஆயிரத்துக்கும் கீழ் பதிவாகி உள்ளது.
சென்னையிலும் மூன்றாவது நாளாக நேற்று ஆயிரத்துக்கும் கீழ் தொற்று பதிவாகியுள்ளது. தமிழகத்தில் நேற்று ஒரே நாளில் 3 ஆயிரத்து 86 பேருக்கு கொரோனா தொற்று உறுதி செய்யப்பட்டுள்ளது. இதனால் தமிழகத்தில் கொரோனாவால் பாதிக்கப்பட்டோரின் எண்ணிக்கை 6 லட்சத்து 97 ஆயிரத்து 116 ஆக உயர்ந்துள்ளது. நேற்று ஒரே நாளில் கொரோனா தொற்றால் 39 பேர் உயிரிழந்துள்ளனர்.
இதனால் தமிழகத்தில் இதுவரை உயிரிழந்தோர் எண்ணிக்கை 10 ஆயிரத்து 780 ஆக உயர்ந்துள்ளது. சென்னையில் நேற்று 845 பேர் வைரஸ் தொற்றுக்கு ஆளாகி உள்ளனர். இவர்களுடன் சேர்த்து சென்னையில் இதுவரை கொரோனாவால் பாதிக்கப்பட்டோரின் எண்ணிக்கை ஒரு லட்சத்து 92 ஆயிரத்து 527 ஆக உயர்ந்துள்ளது.
தமிழகத்தில் நேற்று நான்காயிரத்து 301 பேர் கொரோனாவில் இருந்து குணமடைந்துள்ளனர். இதுவரை 6 லட்சத்து 50 ஆயிரத்து 856 பேர் கொரோனாவில் இருந்து மீண்டுள்ளனர். தமிழக சுகாதாரத் துறை வெளியிட்டுள்ள அறிக்கையின்படி அனைத்து மாவட்டங்களிலும் நேற்று கொரோனா பாதிப்பு உறுதி செய்யப்பட்டுள்ளது. கோவையில் 314 பேரும், சேலத்தில் 198 பேரும், திருவள்ளூரில் 180 பேரும், செங்கல்பட்டில் 159 பேருக்கு கொரோனா பாதிப்பு ஏற்பட்டுள்ளது.