பீகாரின் 6 மாவட்டங்களில் மின்னல் தாக்கி, இறந்த நபர்களின் குடும்பத்தினருக்கு ரூ. 4 லட்சம் நிவாரண நிதி வழங்கப்படும் என முதல்வர் நிதீஷ் குமார் தெரிவித்துள்ளார்.
பீகார் முதலமைச்சர் நிதிஷ்குமார் தனது ட்விட்டர் பக்கத்தில் பதிவு ஒன்றைப் பதிவிட்டுள்ளார். அதில் “மாநிலத்தின் 6 மாவட்டங்களில் 12 பேர் மின்னல் தாக்கி இறந்துள்ளனர். உயிரிழந்தவர்களின் குடும்பத்திற்குத் தலா ரூ 4 லட்சம் நிவாரண நிதியாக வழங்கப்படும். மோசமான காலநிலையில் மக்கள் மிகுந்த எச்சரிக்கையுடன் இருக்குமாறு கேட்டுக்கொள்கிறேன். மேலாண்மைத் துறையால் அடிக்கடி வெளியிடப்படும் பரிந்துரைகளைப் பின்பற்றவும், மோசமான வானிலை நிலவி வருவதால் வீட்டுக்குள் பாதுகாப்பாக இருங்கள் ‘ என்று ட்வீட் செய்துள்ளார்.
அம்மாநிலத்தில் பாட்னா, போஜ்பூர், வைசாலி, நாலந்தா உள்ளிட்ட 12 மாவட்டங்களில் இடியுடன் கூடிய கனமழை பெய்யும் என்று வானிலை ஆய்வு மையம் எச்சரிக்கை விடுத்துள்ளது. முன்னதாக, ஜூலை 2ஆம் தேதி, பீகார் மாநிலத்தின் 3 மாவட்டங்களில் தனித்தனி மின்னல் தாக்குதலில் 6 பேர் பலியாகினர். ஜூலை 3ஆம் தேதி, பீகார் முழுவதும் மின்னல் தாக்கி 13 பேர் பலியாகினர். ஜூலை 4ஆம் தேதி, பீகாரில் பல்வேறு மாவட்டங்களில் மின்னல் தாக்குதலில் 23 பேர் பலியாகியுள்ளனர். மேலும் இடியுடன் கூடிய மழை பெய்ததால் பலர் காயமடைந்தனர்.