இறந்தவரின் உடலுக்கு மலர்வளையம் வைப்பதில் இருதரப்புக்கு இடையே நடந்த சண்டையில் இளைஞர் ஒருவர் கொலை செய்யப்பட்ட சம்பவம் அதிர்ச்சியை ஏற்படுத்தியுள்ளது.
திருப்பூர் – புதுக்காடு பகுதியில் நேற்று முன்தினம் இறந்த நபர் ஒருவரின் இறுதிச் சடங்கில் கலந்துகொள்வதற்கு 25 வயதான கார்த்திக்ராஜா சென்றார்.. அதேபோல அழகுராஜா மற்றும் அவர்களது நண்பர்கள் உள்ளிட்டோரும் சென்றனர்.. இந்தசூழலில் இறந்தவரின் உடலுக்கு மலர் வளையம் வைப்பதில் கார்த்திக் ராஜா தரப்புக்கும், அழகுராஜா தரப்புக்கும் இடையே சண்டை ஏற்பட்டுள்ளது.. இதில் இருதரப்பினரும் ஒருவருக்கொருவர் மாறி மாறி சரமாரியாக தாக்கிக் கொண்டதாக சொல்லப்படுகிறது. மேலும் கார்த்திக் ராஜாவுக்கு தலையில் பலத்த அடி பட்டுள்ளது.
இந்நிலையில், தலையில் படுகாயமடைந்த கார்த்திக்ராஜா கொடுத்த புகாரின் பேரில், அழகுராஜா, மற்றும் அவரது நண்பர்கள் ஆகியோர் மீது திருப்பூர் தெற்கு போலீசார் வழக்குப் பதிவு செய்தனர். இதனைத் தொடர்ந்து நேற்று மாலை பல்லடத்தில் இருக்கும் தன்னுடைய மாமியார் வீட்டுக்குச் சென்ற கார்த்திக்ராஜா, உறங்கிக்கொண்டிருந்த போதே உயிரிழந்துள்ளார்.
அதன்பின் அவருக்கு நடத்தப்பட்ட மருத்துவ பரிசோதனையில், கார்த்திக்ராஜாவின் உச்சந் தலையில் பலத்த காயம் இருந்ததாகவும், அவர் சரியான சிகிச்சை எடுக்காத காரணத்தினால் மூளையில் ரத்தக்கசிவு ஏற்பட்டு இறந்ததாகவும் மருத்துவர்கள் தெரிவித்தனர்.. பின்னர் அழகுராஜா, சக்திவேல், சல்மான்கான் ஆகியோர் மீது கொலை வழக்குப்பதிந்த திருப்பூர் தெற்கு போலீசார், அவர்களிடம் விசாரணை நடத்தி வருகின்றனர்.