நாமக்கல் மாவட்டத்தில் 3வதும் பெண் பிள்ளை பிறந்ததால் தாயே குழந்தையை கொலை செய்த சம்பவம் பெரும் அதிர்வலைகளை ஏற்படுத்தியுள்ளது.
நாமக்கல் மாவட்டம் எருமபட்டியில் சூரியா என்பவர் அவரது மனைவி கஸ்தூரி(27) என்பவருடன் வசித்து வந்துள்ளார். இவர்களுக்கு சிவரஞ்சனி(6), பிரியதர்ஷினி(4) என்ற 2 மகள்கள் உள்ளனர். இந்நிலையில் கஸ்தூரி 3வதாக கர்ப்பமடைந்த நிலையில் நாமக்கல் மருத்துவமனையில் பெண் குழந்தை பிறந்துள்ளது. இதனையடுத்து கடந்த 13ஆம் தேதி அந்த குழந்தை இறந்துவிட்டதாக எருமபட்டி காவல்துறையினருக்கு தகவல் கிடைத்துள்ளது.
இதுகுறித்து தகவலறிந்து சென்ற போலீசார் மற்றும் மருத்துவர்கள் புதைக்கப்பட்ட குழந்தையின் உடலை எடுத்து பிரேத பரிசோதனை நடத்தியுள்ளனர். இதனைத்தொடர்ந்து குழந்தை மரணத்தில் சந்தேகமடைந்த காவல்துறையினர் கஸ்தூரியிடம் நடத்திய விசாரணையில் திடுக்கிடும் தகவல் வெளியாகியுள்ளது. இந்நிலையில் கஸ்தூரிக்கு ஏற்கனவே 2 பெண் குழந்தை உள்ள நிலையில் 3வதாகவும் பெண் குழந்தை பிறந்ததால் ஆத்திரமடைந்த அவர் பெற்ற குழந்தை என்றும் பாராமல் கொலை செய்தது அம்பலமாகியுள்ளது. மேலும் அதிர்ச்சியடைந்த காவல்துறையினர் கஸ்தூரி மீது வழக்குப்பதிவு செய்து கஸ்தூரியை கைது செய்துள்ளனர்.