வீட்டின் பூட்டை உடைத்து 25 ஆயிரம் ரூபாய் மற்றும் வெள்ளி பொருட்களை கொள்ளையடித்து சென்ற மர்ம நபர்களை போலீசார் வலைவீசி தேடி வருகின்றனர்.
திருச்சி மாவட்டத்தில் உள்ள சோமரசம்பேட்டை வாசன் சிட்டி 16 வது கிராஸ் பகுதியில் விஸ்வநாதன் என்பவர் வசித்து வருகிறார். இவருக்கு உமா மகேஸ்வரி என்ற ஒரு மனைவி உள்ளார். இந்த தம்பதிகள் கேரளாவில் உள்ள தனது மகனை பார்ப்பதற்காக வீட்டை பூட்டிவிட்டு சென்றுவிட்டனர். இந்நிலையில் வீட்டிற்கு திரும்பி வந்து பார்த்தபோது, வீட்டின் முன்பக்க கதவு உடைக்கப்பட்டு இருந்ததை பார்த்து அதிர்ச்சி அடைந்தனர்.
இதனையடுத்து வீட்டிற்குள் சென்று பார்த்த போது, பீரோவில் வைக்கப்பட்டிருந்த 25 ஆயிரம் ரூபாய் மற்றும் வெள்ளி பொருட்களை மர்மநபர்கள் திருடி சென்றது தெரியவந்தது. இச்சம்பவம் குறித்து உடனடியாக சோமரசம்பேட்டை போலீசாருக்கு தகவல் தெரிவித்தனர். அதன் பின் சம்பவ இடத்திற்கு விரைந்து வந்த போலீசார் அங்கு ஆய்வு செய்தனர். மேலும் இச்சம்பவம் குறித்து வழக்கு பதிவு செய்த போலீசார் வீட்டின் பூட்டை உடைத்து கொள்ளையடித்து சென்ற மர்ம நபர்களை வலைவீசி தேடி வருகின்றனர்.