நூதன முறையில் பெண்ணிடம் இருந்து நகைகளை மர்ம நபர் பறித்துச் சென்ற சம்பவம் பரபரப்பை ஏற்படுத்தியுள்ளது.
விழுப்புரம் மாவட்டத்தில் உள்ள கோணக்கம்பட்டி கிராமத்தில் ஆறுமுகம் என்பவர் வசித்து வருகிறார். இவருக்கு செல்வி என்ற மனைவி உள்ளார். இந்நிலையில் திடீரென செல்வி வீட்டிற்கு வந்த 25 வயது மதிக்கத்தக்க வாலிபர் அவரிடம் உங்கள் வீட்டு பிரச்சனைகள் தீர வேண்டுமென்றால் அதற்கு பரிகாரம் செய்ய வேண்டும் என கூறியுள்ளார். இதனை அடுத்து செல்வியிடம் அந்த வாலிபர் உங்களின் தங்க நகைகளை வைத்து தான் பரிகாரம் செய்ய வேண்டும் எனக் கூறியதை நம்பிய செல்வி தனது வீட்டில் இருந்த 3 பவுன் நகைகளை அந்த வாலிபரிடம் கொடுத்துவிட்டார்.
அதன்பின் செல்வியை குளித்துவிட்டு வீட்டை சுத்தம் செய்யுமாறும், தான் கோவிலுக்கு சென்று இந்த நகைகளை வைத்து பரிகாரம் செய்து வருவதாக கூறி சென்ற வாலிபர் நீண்ட நேரமாகியும் வரவில்லை. இதனால் தான் ஏமாற்றப்பட்டதை உணர்ந்த செல்வி இதுகுறித்து ரோசனை காவல் நிலையத்தில் புகார் அளித்தார். அந்த புகாரின் பேரில் வழக்கு பதிவு செய்த போலீசார் பெண்ணிடமிருந்து நூதன முறையில் நகைகளை பறித்துச் சென்ற அந்த வாலிபரை வலைவீசி தேடி வருகின்றனர்.