தொழில் போட்டியால் வாலிபரை கத்தியால் குத்தி கொலை செய்த சம்பவம் பரபரப்பை ஏற்படுத்தியுள்ளது.
சிவகங்கை மாவட்டத்திலுள்ள தேவகோட்டை பகுதியில் வேலு என்பவர் வசித்து வருகிறார். இவருக்கு தென்னரசு என்ற மகன் இருந்துள்ளார். மேலும் சிவனூர் பகுதியில் மணிகண்டன் என்பவர் வசித்து வருகிறார். இந்நிலையில் தென்னரசும், மணிகண்டனும் பொக்லைன் எந்திரத்தை வாடகைக்கு எடுத்து ஓட்டி வந்தனர். இதில் இருவருக்கும் இடையே தொழில் போட்டி இருந்து வந்துள்ளது. இந்நிலையில் செலுகை பகுதியில் தென்னரசு, அவரது அண்ணனான காளிதாஸ் மற்றும் நண்பர்களான கணேசன், சுரேஷ் ஆகியோர் நின்று கொண்டிருந்தனர். அப்போது அந்த வழியாக வந்த மணிகண்டனுக்கும் இவர்களுக்கும் இடையே தொழில் போட்டி தொடர்பாக வாக்குவாதம் ஏற்பட்டது.
இதில் மிகவும் ஆத்திரமடைந்த மணிகண்டன் தான் மறைத்து வைத்திருந்த கத்தியால் தென்னரசை சரமாரியாக குத்தியுள்ளார். இதனை தடுக்க வந்த அவரது அண்ணன் மற்றும் நண்பர்களையும் சரமாரியாக கத்தியால் குத்தியுள்ளார். அதன்பின் மணிகண்டன் அங்கிருந்து தப்பிச் சென்றுள்ளார். இதனால் பலத்த காயமடைந்த தென்னரசு சம்பவ இடத்திலேயே பரிதாபமாக உயிரிழந்தார். மேலும் அவரது அண்ணன் மற்றும் இரண்டு நண்பர்கள் உயிருக்கு போராடிக் கொண்டிருந்தனர். இதனைப் பார்த்த அருகிலுள்ளவர்கள் உயிருக்கு போராடிக் கொண்டிருந்த 3 பேரையும் உடனடியாக மீட்டு திருவாடானை அரசு மருத்துவமனையில் சிகிச்சைக்காக அனுமதித்தனர்.
அங்கு அவர்களுக்கு தீவிர சிகிச்சை அளிக்கப்பட்டு வருகிறது. இதுகுறித்து தகவலறிந்த தேவகோட்டை காவல்துறையினர் சம்பவ இடத்திற்கு விரைந்து சென்று தென்னரசு சடலத்தை கைப்பற்றி திருவாடானை அரசு மருத்துவமனைக்கு பிரேத பரிசோதனைக்காக அனுப்பிவைத்தனர். இந்நிலையில் தென்னரசின் உறவினர்கள் திருவாடானை அரசு மருத்துவமனையின் முன்பு கொலையாளியை கைது செய்ய கோரி சாலை மறியலில் ஈடுபட்டுள்ளனர். மேலும் இதுகுறித்து வழக்குப்பதிவு செய்த காவல்துறையினர் தப்பி ஓடிய மணிகண்டனை வலைவீசி தேடி வருகின்றனர்.