தொழிலாளி வீட்டில் நகை, பணத்தை திருடிச் சென்ற மர்ம நபர்களை காவல்துறையினர் வலைவீசி தேடி வருகின்றனர்.
திருப்பூர் மாவட்டத்தில் உள்ள செந்தில்நகர் பகுதியில் செல்வராஜ் என்பவர் வசித்து வருகிறார். இவர் கட்டிட தொழிலாளியாக வேலை பார்த்து வருகிறார். கடந்த 14-ஆம் தேதி செல்வராஜ் பொங்கல் பண்டிகைக்காக வீட்டை பூட்டி விட்டு குடும்பத்துடன் தனது சொந்த ஊரான திருவண்ணாமலைக்கு சென்றிருந்தார். இந்நிலையில் செல்வராஜ் மீண்டும் வீட்டிற்கு வந்த போது முன்பக்க கதவு பூட்டு உடைக்கப்பட்டு இருந்ததை கண்டு அதிர்ச்சியடைந்தார். இதனையடுத்து செல்வராஜ் வீட்டின் உள்ளே சென்று பார்த்தபோது பீரோவில் இருந்த துணிமணிகள் சிதறி கிடந்தன.
மேலும் பீரோவில் இருந்த தங்க காசுகள், மோதிரம் உள்ளிட்ட 3 பவுன் நகை மற்றும் ரூ.10000 பணம் ஆகியவற்றை மர்ம நபர்கள் திருடிச் சென்றது செல்வராஜுக்கு தெரியவந்துள்ளது. இதுகுறித்து செல்வராஜ் அனுப்பர்பாளையம் காவல்நிலையத்தில் புகார் அளித்துள்ளார். அந்த புகாரின் பேரில் வழக்குப்பதிவு செய்த காவல்துறையினர் விசாரணை நடத்தினர். இதனையடுத்து சம்பவ இடத்திற்கு கைரேகை நிபுணர்கள் வரவழைக்கப்பட்டு மர்மநபர்களின் கைரேகை சேகரிக்கப்பட்டது. மேலும் இது குறித்து வழக்கு பதிவு செய்த அனுப்பர்பாளையம் காவல்துறையினர் அப்பகுதியில் பொருத்தப்பட்டிருந்த சிசிடிவி கேமராவில் பதிவான காட்சிகளை ஆய்வு செய்து விசாரணை நடத்தி வருகின்றனர்.