ககன்யான் விண்வெளி வீரர்களுக்கான பயிற்சி இன்னும் மூன்று வாரங்களில் தொடங்கப்படும் என இந்திய விண்வெளி ஆராய்ச்சி மைய தலைவர் சிவன் தெரிவித்துள்ளார்.
இதுகுறித்து அவர் அளித்த பேட்டியில், “விண்வெளிக்கு மனிதனை அனுப்பும் ககன்யான் திட்டத்தில் நான்கு விண்வெளி வீரர்கள் தேர்வு செய்யப்பட்டுள்ளனர். அவர்களுக்கான பயிற்சி இன்னும் மூன்று வாரங்களில் தொடங்கப்படும். சந்திரயான் – 3 திட்டத்திற்கு மத்திய அரசு ஒப்புதல் அளித்துள்ளது. அதற்கான பணிகள் தொடர்ந்து நடைபெற்றுவருகிறது. இரண்டாவது ராக்கெட் ஏவுதளம் தூத்துக்குடியில் அமைக்க திட்டமிடப்பட்டு, நிலம் கையகப்படுத்தும் பணி தொடங்கப்பட்டுள்ளது.
2020ஆம் ஆண்டை பொறுத்தவரை, ககன்யான், சந்திரயான் 3 ஆகிய திட்டங்களுடன் சிறிய செயற்கைக்கோள் ஏவுதள வாகனத்தையும் அனுப்ப இஸ்ரோவால் திட்டமிடப்பட்டுள்ளது. இந்தச் செயற்கைக்கோள் ஏவுதள வாகனம் நானோ தொழில்நுட்பத்தில் வடிவமைக்கப்பட்டு, 500 கிலோ எடை கொண்டதாக இருக்கும். இதற்கு சுமார் 30 கோடி ரூபாய் செலவாகலாம். மேலும் பிஎஸ்எல்வி பணிகளுக்கு 6 குழுக்களின் கீழ் 600 பேர் பணியாற்றவுள்ளனர் என்று கூறினார்.