இரு இடங்களில் நடந்த சாலை விபத்துகளில் 2 பேர் பலியான சம்பவம் குறித்து காவல்துறையினர் விசாரணை நடத்துகின்றனர்.
சிவகங்கை காளையார் கோவிலுக்கு அருகில் உள்ள தூதுகுடி மங்கலம் பகுதியை சேர்ந்தவர் சங்கர். அவருடைய நண்பரின் பெயர் பாலமுருகன். இவர்கள் இருவரும் கோபிசெட்டிபாளையத்திலிருந்து தங்கள் இரு சக்கர வாகனத்தில் காளையார்கோவில் நோக்கி சென்று கொண்டிருந்தனர். அவர்கள் கொடைரோடு அருகே மாவூர் அணை பிரிவில் சென்று கொண்டிருந்த போது, அவர்களுடைய இருசக்கர வாகனத்தின் மீது வேன் ஒன்று மோதியது. இதில் சங்கர் சம்பவ இடத்திலேயே உயிரிழந்தார். படுகாயமடைந்த பாலமுருகன் அம்மையநாயக்கனூர் அரசு சமுதாய நல மையத்தில் சிகிச்சைக்காக சேர்க்கப்பட்டார்.
அதேபோல் செம்பட்டி என்னும் பகுதிக்கு அருகில் உள்ள புதுகாமன்பட்டியை சேர்ந்தவர் ரமேஷ். இவர் மதுரையை நோக்கி தனது இருசக்கர வாகனத்தில் சென்றபோது கொடைரோடு பாலம் அருகில் லாரி ஒன்று மோதியது. இந்த விபத்தில் ரமேஷ் படுகாயமடைந்தார் இதைத்தொடர்ந்து திண்டுக்கல் அரசு மருத்துவமனையில் சிகிச்சைக்காக சேர்க்கப்பட்டிருந்தார். ஆனால் அங்கு அவர் சிகிச்சை பலனின்றி பரிதாபமாக உயிரிழந்தார். இந்த விபத்துகள் குறித்து கொடைரோடு காவல்துறையினர் வழக்குப்பதிவு செய்து விசாரணை நடத்துகின்றனர்.