ஜம்மு காஷ்மீரில் 2 பயங்கரவாதிகள் சுட்டுக் கொல்லப்பட்டு இருக்கும் நிலையில் மற்றொரு பயங்கரவாதியை தேடும் பணி தீவிரம் அடைந்துள்ளது.
ஜம்மு காஷ்மீரில் பதுங்கி உள்ள பயங்கரவாதிகளை தீர்த்துக் கட்டும் நடவடிக்கையில் பாதுகாப்பு படையினர் மற்றும் மாநில போலீசார் சேர்ந்து தீவிர தேடுதல் வேட்டையில் ஈடுபட்டு வருகின்றனர். இதில், ஏராளமான பயங்கரவாதிகள் கொல்லப்பட்டும் உள்ளனர். அதே நேரம் பாதுகாப்பு படையினரை குறி பார்த்து பயங்கரவாதிகள் தொடர்ந்து தாக்குதல் நடத்துகின்றனர். இன்று பாரமுல்லா மாவட்டத்தில் கடும் துப்பாக்கிச்சண்டை நடைபெற்றது. இதில் இரண்டு பயங்கரவாதிகள் சுட்டுக்கொல்லப்பட்டனர். அவர்களிடம் இருந்து ஏ.கே. ரைபிள் மற்றும் இரண்டு துப்பாக்கிகள் கைப்பற்றப்பட்டன.
மேலும் பதுங்கி இருக்கும் மற்றொரு பயங்கரவாதியை தேடும் பணி தீவிரமாக நடைபெற்று வருகிறது. முன்னதாக, கிரீரி பகுதியில் சிஆர்பிஎப் வீரர்கள் மற்றும் மாநில போலீசார் இணைந்து பயங்கரவாதிகளுக்கு எதிரான தேடுதல் வேட்டையில் ஈடுபட்டிருந்தனர். அப்போது பாதுகாப்பு படையினரை நோக்கி பயங்கரவாதிகள் துப்பாக்கி சூடு நடத்தினர். பாதுகாப்பு படையினரும் பதிலடி கொடுத்தனர். ஆனால் இந்த மோதலில், சிஆர்பிஎப் வீரர்கள 2 பேர், போலீஸ் தரப்பில் ஒருவர் என 3 வீரர்கள் உயிரிழந்தனர்.