பாகிஸ்தானுக்கு நாங்கள் வென்டிலேட்டர்களை அனுப்பி வைப்போம் என அதிபர் டிரம்ப் தெரிவித்துள்ளார்
உலகம் முழுவதும் கொரோனா தொற்று பரவி பல உயிர்களை எடுத்துள்ள நிலையில் அமெரிக்காவில் அதிகம் பாதிப்பு ஏற்பட்டு உயிரிழப்புகளுடன் சேர்ந்து பொருளாதாரமும் பெரிதளவு பாதிக்கப்பட்டுள்ளது. இந்நிலையில் பல நாடுகளில் நோயாளிகளின் சிகிச்சைக்கு அத்தியாவசிய தேவையாக இருக்கும் செயற்கை சுவாச கருவி தட்டுப்பாடு ஏற்பட்டுள்ளது. இதனையடுத்து அமெரிக்க அதிபர் டிரம்ப் செயற்கை சுவாச கருவி தேவைப்படும் நாடுகளுக்கு நாங்கள் அனுப்பி வைப்போம் என தெரிவித்துள்ளார்.
இதுகுறித்து அதிபர் டிரம்ப் செய்தியாளர்களிடம் அளித்த பேட்டியில், “வென்டிலேட்டர் தேவைப்படும் நாட்டு தலைவர்களுடன் நான் பேசினேன். அவர்களின் தேவைகளை பூர்த்தி செய்வதற்கு அமெரிக்கா நிச்சயம் உதவும் என்று கூறினேன். இதனையடுத்து பாகிஸ்தானுக்கு நாங்கள் வென்டிலேட்டர்களை அனுப்பி வைப்போம். அதேபோன்று மெக்சிகோ, இத்தாலி, பிரான்ஸ் போன்ற நாடுகளுக்கும் வென்டிலேட்டர்களை நாங்கள் அனுப்பி வைப்போம்” என டிரம்ப் கூறியுள்ளார். ஆனால் பாகிஸ்தானுக்கு கொடுக்கப்படும் வென்டிலேட்டர்கள் விலைக்கு கொடுக்கப்படுகிறதா? அல்லது இலவசமாக வழங்கப்படுகிறதா? என்பது குறித்து அவர் எதுவும் தெரிவிக்கவில்லை.
