வாலிபரை தாக்கி கொலை மிரட்டல் விடுத்தவரை காவல்துறையினர் கைது செய்துள்ளனர்.
தூத்துக்குடி மாவட்டத்திலுள்ள லெவிஞ்சிபுரம் பகுதியில் கண்ணன் என்பவர் வசித்து வருகிறார். இவருக்கு வெங்கடேஷ் என்ற மகன் உள்ளார். இவருக்கும் பாத்திமா நகர் பகுதியில் வசிக்கும் ரகுமான் என்பவருக்கும் இடையே முன்விரோதம் இருந்து வந்துள்ளது. இந்நிலையில் தூத்துக்குடி-திருச்செந்தூர் சாலையில் உள்ள திருமண மண்டபம் அருகில் வெங்கடேஷ் நின்று கொண்டிருந்தார்.
அப்போது அங்கு வந்த ரகுமான் மற்றும் அவரது நண்பர் குமார் ஆகிய 2 பேரும் சேர்ந்து வெங்கடேஷிடம் தகராறில் ஈடுபட்டுள்ளனர். மேலும் வெங்கடேஷை தாக்கி கொலை மிரட்டல் விடுத்துள்ளனர். இதுகுறித்து வெங்கடேஷ் தூத்துக்குடி தென்பாகம் காவல்நிலையத்தில் புகார் அளித்துள்ளார். அந்த புகாரின் பேரில் வழக்கு பதிவு செய்த காவல்துறையினர் ரகுமானை கைது செய்துள்ளனர்.