திருப்பத்தூரில் முழு ஊரடங்கை முன்னிட்டு காய்கறி மற்றும் பழங்கள் வாகனங்களில் வினியோகம் செய்யப்பட்டு வருகின்றது.
தமிழகத்தில் கொரோனா தொற்றை கட்டுப்படுத்த ஒரு வாரம் முழு ஊரடங்கை தமிழக முதல்வர் திரு. முக. ஸ்டாலின் அறிவித்துள்ளார். இதனால் பொதுமக்களுக்கு தேவையான அத்தியாவசிய பொருட்களான காய்கறி, பழங்கள் போன்றவை தடையில்லாமல் கிடைப்பதற்கு மாவட்ட நிர்வாகம் உரிய நடவடிக்கை எடுக்க வேண்டும் என்று தமிழக அரசு அறிவித்துள்ளது. அதன்படி திருப்பத்தூர் மாவட்டத்தின் பல்வேறு பகுதிகளில் பொதுமக்களுக்கு தேவையான காய்கறி, பழங்கள், மளிகைப் பொருட்கள் போன்றவை தடையின்றி கிடைப்பதற்கு மாவட்ட நிர்வாகம் நடவடிக்கை எடுத்துள்ளது.
இதனையடுத்து மாவட்டம் முழுவதிலும் 244 வாகனங்களில் பொதுமக்களுக்கு தேவையான காய்கறிகள் வினியோகம் செய்யப்பட்டது. ஆனால் திருப்பத்தூரில் சில பகுதிகளுக்கு காய்கறி வாகனங்கள் வரவில்லை என்று பொதுமக்கள் கூறியுள்ளனர். எனவே அனைத்து பகுதிகளுக்கும் காய்கறி வாகனங்கள் செல்வதற்கு மாவட்ட நிர்வாகம் நடவடிக்கை எடுக்க வேண்டும் என்று சமூக ஆர்வலர்கள் கோரிக்கை விடுத்தள்ளனர்.