இறந்தவரின் சடலத்தை வாய்க்கால் வழியாக கொண்டு செல்லும் அவலநிலையை தடுக்க பாலம் அமைத்து தரவேண்டி பொதுமக்கள் கோரிக்கை விடுத்துள்ளனர்.
தஞ்சாவூர் மாவட்டத்திலுள்ள வீரியங்கோட்டை ஆதிதிராவிடர் தெருவில் வசித்து வந்த மகாலிங்கம் என்பவர் உடல்நலக்குறைவால் பரிதாபமாக உயிரிழந்து விட்டார். இதனையடுத்து மயானத்திற்கு போகும் பாதையின் குறுக்கில் கிளை பாசன வாய்க்கால் இருக்கிறது. இதில் தற்போது தண்ணீர் சென்று கொண்டிருப்பதால் மகாலிங்கத்தின் சடலத்தை அவரது உறவினர்கள் வாய்க்காலில் இறங்கி தூக்கிச் செல்லும் அவலநிலை ஏற்பட்டுள்ளது. ஆகவே வாய்க்காலின் குறுக்கே பாலம் அமைத்து தர வேண்டும் என்று அப்பகுதி மக்கள் கோரிக்கை விடுத்துள்ளனர்.
இதுகுறித்து அப்பகுதி மக்கள் கூறியபோது வெயில் காலங்களில் வாய்க்காலில் தண்ணீர் வராதபோது ஓரளவு சமாளித்து இறந்தவர்களின் சடலத்தை ஆற்றில் இறங்கி மறு கரைக்கு கொண்டு சென்று இறுதிச் சடங்குகள் நடத்தி வருகின்றோம். ஆனால் மழை காலங்களில் வாய்க்காலில் தண்ணீர் வரும்போது இறந்தவரின் சடலத்தை வைத்துக்கொண்டு வாய்க்காலை கடந்து மறுபுறம் கொண்டு செல்வது சிரமமாக இருக்கின்றது. மேலும் வேறு பாதை வழியாக செல்ல வேண்டுமென்றால் பல கிலோ மீட்டர் தூரம் சுற்றி செல்ல வேண்டும். ஆகவே வாய்க்காலின் குறுக்கே பாலம் அமைத்து தந்தால் இறந்தவர்களின் சடலத்தை கொண்டு செல்வதற்கு வசதியாக இருக்கும் என்று அப்பகுதி மக்கள் கோரிக்கை விடுத்துள்ளனர்.