மின்சார ரயிலில் பள்ளி மாணவி தொங்கியபடி நடைமேடையில் காலை உரசி ஆபத்தான பயணம் செய்த வீடியோ காட்சி சமூக வலைதளங்களில் பரவி பரபரப்பை ஏற்படுத்தியுள்ளது.
சென்னை மாவட்டத்தில் உள்ள வேளச்சேரியில் இருந்து திருவள்ளூர் நோக்கி மின்சார ரயில் சென்றுள்ளது. இந்நிலையில் ஆவடி ரயில் நிலையத்திலிருந்து ரயில் புறப்பட்டதும் அதில் ஏறிய பள்ளி மாணவி ஒருவர் மாணவர்களுக்கு சவால் விடும் வகையில் ஓடும் மின்சார ரயிலில் படிக்கட்டில் தொங்கியபடி ஒரு காலை நடைமேடையில் உரசியபடி ஆபத்தான பயணம் செய்துள்ளார். இதை ரயில் இருந்த பயணிகள் கண்டு அதிர்ச்சி அடைந்துள்ளனர். இதனை அடுத்து ரயிலில் இருந்த ஒருவர் பள்ளி மாணவியின் இந்த செயலை செல்போனில் வீடியோ எடுத்து சமூக வலைதளங்களில் பதிவேற்றம் செய்துள்ளார்.
தற்போது இந்த வீடியோ சமூக வலைதளங்களில் வைரலாக பரவி பரபரப்பு ஏற்படுத்தி வருகிறது. இதனை தொடர்ந்து கல்லூரி மாணவர்கள் தான் இது போல் ஓடும் மின்சார ரயிலில் தொங்கியபடி நடைமேடையில் கால்களை உரசிய படியும், அரிவாள், கத்தி உரசிய படியும் ஆபத்தான பயணம் செய்து வந்த நிலையில் மாணவர்களுக்கு நாங்களும் சளைத்தவர்கள் இல்லை என்பது போல் பள்ளி மாணவியின் இந்த செயல் அமைந்திருப்பதாக பயணிகள் தெரிவித்துள்ளனர். மேலும் ஆபத்தை உணராத இது போன்ற சம்பவங்களால் சில நேரங்களில் உயிரிழப்பு ஏற்படுவதை தடுக்க ரயில்வே காவல்துறையினர் உரிய நடவடிக்கை எடுக்குமாறு பயணிகள் கோரிக்கை விடுத்துள்ளனர்.