வியாபாரியை தாக்கிய 2 பேரை காவல்துறையினர் கைது செய்துள்ளனர்.
விருதுநகர் மாவட்டத்தில் உள்ள பாண்டியன்நகர் பகுதியில் ராஜேந்திரன் என்பவர் வசித்து வருகிறார். இவர் பழைய இரும்பு கடை வைத்து தொழில் நடத்தி வருகின்றார். இவர் வழக்கம் போல் கடையிலேயே இரவு நேரங்களில் தூங்கி விழிப்பார். கடந்த ஆகஸ்ட் 27 ஆம் தேதியன்று ராஜேந்திரன் தனது கடையில் வெளியே தூங்கிக் கொண்டிருந்தார். அப்போது அதே பகுதியில் வசிக்கும் மாரிமுத்து மற்றும் மாரீஸ்வரன் ஆகியோர் ராஜேந்திரனிடம் பீடி கேட்டு தகராறில் ஈடுபட்டுள்ளனர்.
அதன்பிறகு ஆத்திரமடைந்த இருவரும் இரும்பு கம்பியால் ராஜேந்திரனை தாக்கியுள்ளனர். இதனை பார்த்ததும் அருகில் உள்ளவர்கள் ராஜேந்திரனை மீட்டு அரசு மருத்துவமனைக்கு சிகிச்சைக்காக அனுப்பி வைத்துள்ளனர். இது குறித்து ராஜேந்திரனின் மகனான கோவிந்தராஜ் என்பவர் காவல் நிலையத்திற்கு சென்று புகார் அளித்துள்ளார். அந்த புகாரின் பேரில் வழக்குப்பதிவு செய்த காவல்துறையினர் மாரிமுத்து மற்றும் மாரிஸ்வரனை கைது செய்து தீவிர விசாரணை மேற்கொண்டு வருகின்றனர்.