வழிப்பறியில் ஈடுபட்ட 3 பேரை காவல்துறையினர் கைது செய்துள்ளனர்.
தூத்துக்குடி மாவட்டத்தில் திருச்செந்தூர் காவல்துறையினர் தீவிர ரோந்து பணியில் ஈடுபட்டுள்ளனர். அப்போது சண்முகபுரம்-ராணிமகாராஜபுரம் சாலையில் சென்று கொண்டிருந்த போது அங்குள்ள காட்டு பகுதியில் சந்தேகத்திற்கிடமான வகையில் 3 பேர் நின்று கொண்டிருந்தனர். இதனை பார்த்த காவல்துறையினர் அவர்களை மடக்கி பிடித்து விசாரணை நடத்தினர். அந்த விசாரணையில் அவர்கள் முறப்பநாடு பகுதியில் வசிக்கும் அய்யப்பன், தம்பன் மற்றும் சாரதி என்பது தெரியவந்துள்ளது.
மேலும் அவர்கள் அப்பகுதியில் வந்து கொண்டிருந்த ஒருவரிடம் வழிப்பறியில் ஈடுபட்டது காவல்துறையினருக்கு தெரியவந்துள்ளது. இதுகுறித்து வழக்கு பதிவு செய்த காவல்துறையினர் 3 பேரையும் கைது செய்துள்ளனர். மேலும் பாளையங்கோட்டை காவல்நிலையத்தில் அய்யப்பன் மீது ஒரு கொலை வழக்கும், தம்பன் மீது செய்துங்கநல்லூர் காவல்நிலையத்தில் ஒரு வழிப்பறி வழக்கும், சாரதி மீது நெல்லை மாவட்டத்திலுள்ள மூலக்கரைப்பட்டி காவல் நிலையத்தில் ஒரு கொலை வழக்கு உள்பட 2 வழக்குகள் உள்ளது என்பது குறிப்பிடத்தக்கது.