ஓடை கால்வாயில் சிக்கிய 4 நபர்களை தீயணைப்பு வீரர்கள் பத்திரமாக மீட்டனர்.
ராணிப்பேட்டை மாவட்டத்தில் உள்ள நந்திமங்கலம் ஏரியில் இருந்து வெளியேறும் தண்ணீர் இரண்டு கால்வாய்கள் மூலமாக செல்கின்றது. இந்நிலையில் இந்த இரண்டு கால்வாய்களுக்கு மத்தியில் காஞ்சிபுரம் மாவட்டத்தின் உத்திரமேரூரை சேர்ந்த சந்திரன் மற்றும் காசியம்மாள் குடிசை அமைத்து தங்கி வேலை பார்த்து வந்தனர். இதனையடுத்து ஓடை கால்வாய்களில் வெள்ளப்பெருக்கு ஏற்பட்டு இருப்பதால் அவர்கள் இருவரும் வெளியே வர முடியாமல் சிக்கிக் கொண்டுள்ளனர். இதே போல் நந்திமங்கலம் கிராமத்தில் வசிக்கும் சத்யா, சாய்ராம் ஆகியோரும் வெள்ளநீரில் சிக்கிக் கொண்டுள்ளனர்.
இது குறித்து தகவலறிந்த தாசில்தார் வெற்றி குமார், தீயணைப்பு நிலைய அலுவலர் த. செல்வம் தலைமையில் 6 வீரர்கள் விரைந்து சென்று அவர்கள் 4 பேரையும் கயிறு கட்டி மீட்டுள்ளனர். அதன்பின் 8 ஆடுகள் மற்றும் இரண்டு குட்டிகளையும் தீயணைப்பு வீரர்கள் மீட்டுள்ளனர். இதனை தொடர்ந்து இது தொடர்பாக தகவல் அறிந்த தொகுதி காங்கிரஸ் எம்.எல்.ஏ ஏ.எம். முனிரத்தினம் நேரில் சென்று ஆறுதல் கூறியுள்ளார். மேலும் அவர்களை முகாமில் தங்க வைத்து உணவு வழங்க வருவாய் துறைக்கு அறிவுறுத்தி உள்ளார்.