சரக்கு ஆட்டோ பள்ளத்தில் கவிழ்ந்த விபத்தில் வாலிபர் உயிரிழந்த சம்பவம் சோகத்தை ஏற்படுத்தியுள்ளது.
திருப்பூர் மாவட்டத்தில் உள்ள மறவபாளையம் கிராமத்தில் நாகராஜ் என்பவர் வசித்து வருகிறார். இவருக்கு ஹரிகிருஷ்ணன் என்ற மகன் இருந்துள்ளார். இவர் சரக்கு ஆட்டோ ஓட்டி வேலை செய்து வந்துள்ளார். இந்நிலையில் ஹரிகிருஷ்ணன் பரஞ்சேர்வழி-திட்டுப்பாறை சாலை வழியாக வந்துள்ளார். அப்போது கருப்பணசாமி கோவில் அருகில் வந்து கொண்டிருந்தபோது திடீரென சரக்கு ஆட்டோ நிலை தடுமாறி சாலையோரம் இருந்த பள்ளத்தில் கவிழ்ந்தது.
இந்த விபத்தில் ஆட்டோவில் சிக்கி பலத்த காயமடைந்த ஹரிகிருஷ்ணன் சம்பவ இடத்திலேயே பரிதாபமாக உயிரிழந்தார். இதனை பார்த்த அருகில் இருந்தவர்கள் இதுகுறித்து காங்கேயம் காவல்துறையினருக்கு தகவல் தெரிவித்துள்ளனர். அந்த தகவலின்படி சம்பவ இடத்திற்கு விரைந்து சென்ற காவல்துறையினர் ஹரிகிருஷ்ணனின் உடலை உடனடியாக மீட்டு காங்கேயம் அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். மேலும் இது குறித்து வழக்கு பதிவு செய்த காவல்துறையினர் விசாரணை மேற்கொண்டு வருகின்றனர்.