சமரசம் செய்ய வந்த விவசாயியை அடித்து கொலை செய்யப்பட்ட சம்பவம் பரபரப்பை ஏற்படுத்தியுள்ளது.
அரியலூர் மாவட்டத்திலுள்ள செந்துறை பகுதியில் முருகேசன் என்பவர் வசித்து வருகிறார். இவருக்கு அருள்குமார் என்ற மகன் உள்ளார். அதே பகுதியில் கலையரசன் என்பவர் வசித்து வருகிறார். இந்நிலையில் முருகேசனும் கலையரசனும் அருகருகே உள்ள நிலத்தை குத்தகைக்கு எடுத்து விவசாயம் செய்து வருகின்றனர். இதனையடுத்து பாதை சம்பந்தமாக இருவருக்குமிடையில் முன்விரோதம் இருந்து வந்துள்ளது. இதனால் இருவருக்கும் இடையே சில நாட்களுக்கு முன்பு வழக்கம் போல் பிரச்சினை ஏற்பட்டுள்ளது.
இந்த பிரச்சனையில் முருகேசன் குடும்பத்தினர் கலையரசனையும் அவரது மனைவியையும் தாக்கியுள்ளனர். மேலும் முருகேசனின் மகன் அருள்குமார் காவல் நிலையத்தில் புகார் அளித்துள்ளார். இந்நிலையில் கலையரசனின் தம்பியான சிலம்பரசன் என்பவர் அருள்குமாரிடம் ஏன் என் அண்ணன் அண்ணியை தாக்கி என் மீதும் பொய் புகார் கொடுத்துள்ளீர்கள் என கேட்டு போது இருவருக்கும் இடையே வாக்குவாதம் ஏற்பட்டது. இதனால் மிகவும் ஆத்திரமடைந்த அருள்குமார் சிலம்பரசனை அடித்து தாக்கியுள்ளார்.
இந்த தகராறை தடுப்பதற்காக வந்த அப்பகுதியில் வசிக்கும் விவசாயியான பிச்சைப்பிள்ளை இருவரையும் சமாதானம் செய்ய முயற்சித்துள்ளார். இதனால் ஆத்திரமடைந்த அருள்குமார் மற்றும் அவரது குடும்பத்தினரும் பிச்சைப்பிள்ளையை அடித்து தாக்கி உள்ளனர். மேலும் அருள்குமார் பிச்சைப்பிள்ளையின் பின்மண்டையில் உருட்டுக்கட்டையால் அடித்ததில் அவருக்கு பலத்த காயம் ஏற்பட்டுள்ளது. இதனைப்பார்த்த அருகிலுள்ளவர்கள் பிச்சைப்பிள்ளையை உடனடியாக மீட்டு அருகிலுள்ள செந்துறை அரசு மருத்துவமனைக்கு சிகிச்சைக்காக அனுப்பி வைத்தனர்.
ஆனால் பிச்சை பிள்ளையை பரிசோதித்த டாக்டர்கள் அவர் ஏற்கனவே இறந்து விட்டதாக கூறினர். இதுகுறித்து தகவலறிந்த மதுரை காவல்துறையினர் பிச்சைப்பிள்ளையின் உடலை அரியலூர் அரசு மருத்துவமனைக்கு பிரேத பரிசோதனைக்காக அனுப்பி வைத்தனர். மேலும் இச்சம்பவம் குறித்து வழக்குப்பதிவு செய்த காவல்துறையினர் முருகேசன், அருள்குமார், ராமலிங்கம், ஆகாஷ் ஆகிய 4 பேரையும் கைது செய்து விசாரணை மேற்கொண்டு வருகின்றனர். மேலும் பிச்சைப்பிள்ளையை அடித்த இரண்டு பெண்களை காவல்துறையினர் வலைவீசி தேடி வருகின்றனர்.