பிரபல இயக்குனர் வம்சி இயக்கத்தில் நடிகர் விஜய் நடிக்கும் வாரிசு படத்தை தில் ராஜு தயாரிக்கிறார். இந்த படத்திற்கு இசையமைப்பாளர் தமன் இசையமைக்கிறார். ராஷ்மிகா மந்தனா நாயகியாக நடிக்கிறார். இந்த படத்தில் சரத்குமார், பிரகாஷ்ராஜ், பிரபு, யோகி பாபு உள்ளிட்ட நட்சத்திர பட்டாளமே நடிக்கின்றது. இது முழுக்க முழுக்க சென்டிமென்ட் கதையாக உருவாக இருக்கிறது என்று வாரிசு திரைப்பட வட்டாரங்கள் தகவல்கள் தெரிவிக்கின்றன.
ஏற்கனவே ஹைதராபாத் போன்ற பகுதிகளில் பிரமாண்ட செட் அமைக்கப்பட்டு பல்வேறு கட்டங்களாக பாடல் மற்றும் சண்டைக் காட்சிகள் படமாக்கப்பட்டு வந்தது. இந்நிலையில் விஜய் ரசிகர்களை உற்சாகப்படுத்தும் வகையில், ஃபர்ஸ்ட் சிங்கிள், செகன்ட் சிங்கிள் என பாடல்கள் வெளியாகின. இந்த நிலையில் தான் வாரிசு திரைப்படத்தின் இசை வெளியீட்டு விழா சென்னையில் நேரு விளையாட்டு அரங்கில் நேற்று நடைபெற்றது.
நேற்று மாலை சரியாக 6 மணிக்கு வாரிசு திரைப்படத்தின் கோலாகல இசை வெளியீட்டு விழா தொடங்கியது. ஆனால் ரசிகர்கள் மதியம் 2 மணிக்கே வரத்தொடங்கினர். குறிப்பாக நடிகர் விஜய், நடிகை ராஷ்மிகா மந்தனா, நடிகர்கள் சரத்குமார், பிரகாஷ்ராஜ், யோகி பாபு மற்றும் பட குழுவினர் அனைவருமே வாரிசு இசை வெளியீட்டு விழாவில் கலந்து கொண்டார்கள். இந்த இசை வெளியீட்டு விழாவை காண்பதற்காக ஏராளமான ரசிகர்கள் கூட்டம் கூட்டமாக சென்றனர்.
இந்நிலையில் வாரிசு வெளியிட்டு விழாவின் போது நடிகர் விஜய் மேடையில் பேசினார். அவர் பேசியதாவது, 1990-களில் எனக்கு ஒரு நடிகர் போட்டியாளராக இருந்தார். அவர் எனக்கு சீரியஸான போட்டியாளரா கொஞ்ச நாள்ல மாறிட்டாரு. அவருடைய வெற்றியால் நானும் ஓட வேண்டி இருந்தது. நான் அவரை விட அதிகமா ஜெயிக்கணும்னு நினைச்சேன். இதேபோன்று ஒரு போட்டியாளர் அனைவருக்கும் தேவை.
அந்த போட்டியாளர் பெயர் ஜோசப் விஜய். நீங்கள் அனைவரும் உங்களுடன் போட்டி போடுங்கள். தேவையான விமர்சனங்கள் மற்றும் தேவையற்ற விமர்சனங்கள் தான் நம்மளை ஓட வைக்கும். வாழ்க்கையில் முன்னேறி செல்ல வேண்டுமென்றால் கண்டிப்பாக உங்களுக்கு ஒரு போட்டியாளர் தேவை. ஆனால் அந்த போட்டியாளர் நீங்களாகத்தான் இருக்க வேண்டும் என்று கூறினார். மேலும் நடிகர் விஜய் பேசியது தற்போது சமூக வலைதளங்களில் வைரல் ஆகி வருகிறது.