தளபதி விஜய்யின் அடுத்த படத்தை யார் இயக்கப் போகிறார் என்ற தகவல் வெளியாகியுள்ளது.
தமிழ் சினிமாவின் முன்னணி நட்சத்திர நாயகனாக வலம் வரும் விஜய் தற்போது நெல்சன் திலீப் குமார் இயக்கத்தில் ‘தளபதி65’ திரைப்படத்தில் நடித்து வருகிறார். இத்திரைப்படத்தில் பூஜா ஹெக்டே நாயகியாக நடிக்கிறார். இப்படத்தின் முதற்கட்ட படப்பிடிப்பு ஜார்ஜியாவில் நடந்து முடிந்த நிலையில் அடுத்தகட்ட படப்பிடிப்பு சென்னையில் நடைபெற இருந்தது.
ஆனால் தற்போது ஊரடங்கு பிறப்பிக்கப்பட்டுள்ளதால் இப்படத்தின் அடுத்தகட்ட படப்பிடிப்பு தள்ளி வைக்கப்பட்டுள்ளது. இதை தொடர்ந்து தளபதி விஜய்யின் அடுத்த படத்தை யார் இயக்கப் போகிறார்கள், தயாரிக்கப் போகிறார்கள் என்று பேசப்பட்டு வருகிறது. இந்நிலையில் தளபதி விஜயின் அடுத்த படத்தை பிரபல இயக்குனர் வம்சி இயக்க இருப்பதாக தகவல் வெளியாகி உள்ளது.
இதுகுறித்து இயக்குனர் வம்சி சமீபத்தில் அளித்த பேட்டியில், அவர் விஜயிடம் அதிரடியான திரில்லர் கதை ஒன்றை கூறியதாகவும், அந்த கதை விஜய்க்கு மிகவும் பிடித்ததாகவும் கூறப்படுகிறது. ஆகையால் விஜய்யின் அடுத்த படத்தை இவர்தான் இயக்க போகிறார் என்று கூறப்படுகிறது.